Showing posts with label ജൈവശാസ്ത്രം. Show all posts
Showing posts with label ജൈവശാസ്ത്രം. Show all posts

6/06/2011

പുല്കൃഷി യന്ത്രം

കൃഷി ചെയ്യാനുള്ള അടിസ്ഥാന ഘടകങ്ങളില്‍ പ്രമുഖമായ ഒന്നാണു മണ്ണ് .
സസ്യങ്ങള്ക്ക് ആവശ്യമായ പോഷകങ്ങള്‍ നല്ക്കുന്ന മീഡിയം എന്ന നിലയിലും സസ്യങ്ങളെ താങ്ങി നിര്‍ത്തുന്ന അടിത്തറ എന്ന നിലയിലും മണ്ണ് ഒരു അവശ്യ വസ്തുവാണ്‍ . ഈ രണ്ട് ധര്മ്മങ്ങളും പരിഗണിച്ചാല്‍ മനസ്സിലാക്കാവുന്ന ലളിതമായ ഒന്നുണ്ട്, മണ്ണിന്റെ താങ്ങ് ഒഴിവാക്കാന്‍ സാധിക്കുന്ന സസ്യങ്ങള്ക്ക്, പോഷണം ലഭിക്കാന്‍ മറ്റു മാര്‍ഗ്ഗങ്ങള്‍ അവലംബിക്കുന്ന പക്ഷം മണ്ണില്ലാതെയും വളരുവാന്‍ സാധിക്കും . ഹൈഡ്രോ പോണിക്സ് എന്ന് വിളിക്കപ്പെടുന്ന ഈ സങ്കല്പം 5000 വര്‍ഷങ്ങള്ക്ക് മുമ്പ് ബാബിലോണില്‍ ആരംഭിച്ചു എന്നു വേണം കരുതാന്‍ . ബിലോണിലെ ഹാങിങ് ഗാര്ഡന്‍ ആയിരുന്നു അത് . ജലം എന്ന അര്‍ത്ഥം വരുന്ന "ഹൈഡ്രോ", ജോലി എന്ന അര്‍ഥം വരുന്ന "പോണിക്സ്" എന്നിവ ചേര്ന്ന ഹൈഡ്രോപോണിക്സിന്റെ അര്‍ത്ഥം ഏറെ വിശദമാക്കേണ്ടുന്നതല്ലല്ലോ. സസ്യങ്ങള്ക്കാവശ്യമായ ധാതു പോഷണങ്ങള്‍ കലര്‍ന്ന ജലത്തില്‍ ഇവയെ വളര്‍ത്തുന്നു എന്ന് ലളിതമായി പറയാം. ഇന്ന് ഹൈഡ്രോപോണിക്സ് സാങ്കേതിക വിദ്യ വളരെ വളരുകയും ഏതാണ്ട് എല്ലാ സസ്യങ്ങളെയും ഈ രീതിയില്‍ വിജയകരമായി വളര്‍ത്താന്‍ സാധിക്കുകയും ചെയ്തിട്ടുണ്ട്. ഇതിന്റെ ചുവടുപിടിച്ചാണു വ്യാവസായിക അടിസ്ഥാനത്തില്‍ തീറ്റപ്പുല്‍ കൃഷിക്ക് ഈ വിദ്യ പ്രയോജനപ്പെടുത്താന്‍ ശ്രമം ആരംഭിച്ചത്. ഇന്ത്യന്‍ കമ്പനിയായ ഡാബറിന്റെ അനിമല്‍ ഹെല്ത് വിഭാഗമായ ആയൂര്‍വെറ്റാണു പൂര്ണ്ണമായും പ്രവര്ത്തന സജ്ജമായ ഒരു ഹൈഡ്രോപോണിക്സ് പുല്ലു വളര്ത്തു യന്ത്രവുമായി മാര്ക്കറ്റില്‍ എത്തിയിരിക്കുന്നത് .

എന്തുകൊണ്ട് ഹൈഡ്റോ പോണിക്സ് :

നമ്മുടെ നാട്ടില്‍ ഇന്നു ഏറ്റവും വിലയേറിക്കൊണ്ടിരിക്കുന്ന ഒന്നാണു ഭൂമി, അഥവാ മണ്ണ്. വിലയേറ്റത്തെക്കാള്‍ പ്രധാനം ആളൊഹരി ലഭ്യതയിലുള്ള കുറവാണു. ലഭ്യമായ ഭൂമിയില്‍ തന്നെ ആവശ്യം വരുന്ന തൊഴിലിനു നല്കേണ്ടി വരുന്ന കൂലി,നല്കുന്ന കൂലിക്ക് തിരികെ ലഭിക്കുന്ന ക്ഷമത എന്നിവകൂടി കണക്കിലെടുത്താല്‍ ഏക്കറ് കണക്കിനാവശ്യമായി വരുന്ന കൃഷിഭൂമി മൃഗസംരക്ഷണ പ്രവര്ത്തനങ്ങള്ക്ക് ലഭിക്കുക ആസാദ്ധ്യം. ഇനി മിഡില്‍ ഈസ്റ്റ് പോലെയുള്ള സ്ഥലങ്ങളിലെ കാര്യമെടുക്കുകയാണെങ്കില്‍ കൃഷിയോഗ്യമായ ഭൂമി ലഭിക്കുക അത്ര എളുപ്പമല്ല. അതിലുമുപരി 5 ഡിഗ്രി മുതല്‍ 50 ഡിഗ്രി വരെ താപ നിലകളിലെ വ്യതിയാനം, ശുദ്ധ ജലത്തിന്റെ ലഭ്യതക്കുറവു എന്നിവ പുല്കൃഷിയെ അസാദ്ധ്യമാക്കുന്നു. ഈ സാഹചര്യത്തിലാണു പുല്‍കൃഷിക്ക് ഹൈഡ്രോ പോണിക്സ് മെഷീന്‍ കടന്നു വരുന്നത്.

മെഷീന്‍ :



പൂര്ണ്ണമായും അടഞ്ഞ ഒരു മൂറിയോടോ, കണ്ടൈനറ് ലോറിയുടെ കണ്ടൈനറിനോടോ ഇതിനെ ഉപമിക്കാം. ഇതില്‍ താപനില, ഈര്പ്പം, സൂര്യപ്രകാശം, വായു സഞ്ചാരം, ജല വിതരണം എന്നിവയെല്ലാം ഒരു മൈക്രോപ്രോസസറിനാല്‍ നിയന്ത്രിക്കപ്പെടുന്നു. കണ്ടൈനറിലെ വായുവാകട്ടെ പൂര്ണ്ണമായും ഓസോണേറ്റ് ചെയ്ത് ശുദ്ധീകരിക്കപ്പെട്ടുകൊണ്ടിരിക്കുകയും ചെയ്യും. ഇപ്രകാരം നിയന്ത്രിതമായ കൃത്രിമ അന്തരീക്ഷത്തിലാണു പുല്‍വിത്ത് മുളച്ച് വളരുന്നത്.

കൃഷി രീതി

ഓരോ ദിവസം എന്ന കണക്കില്‍ എട്ടു ചാക്രിക ഘട്ടങ്ങളിലായാണു ഇതു പ്രവര്ത്തിക്കുന്നതെന്ന് പറയാം, ഓരോ ദിവസവും ഓരോ ട്രേ വീതം വിത്തുകള്‍ ലോഡ് ചെയ്തുകൊണ്ടേ ഇരിക്കും, ഒരോ ട്രേ വരുന്നതിനനുസരിച്ച് ആദ്യ ട്രേ മുന്നോട്ട് നീങ്ങുന്നു. ഒരോ ട്രേയിലേക്കും പ്രത്യേകമായി തയ്യാറാക്കിയ ധാതുലവണ ലായനി, നിശ്ചിത ഇടവേളകളില്‍ തളിക്കപ്പെട്ടുകൊണ്ടിരിക്കുന്നു.സൂര്യ പ്രകാശത്തിന്റെ അളവ് ആവശ്യാനുസരണം നിയന്ത്രിക്കാം. ഏഴാം ദിവസം കഴിയുമ്പോഴേക്കും ആദ്യ ട്രേയിലെ വിത്ത് വളര്ന്നു തീറ്റാന്‍ പരുവത്തിനു വളര്‍ ച്ചയെത്തുന്നത് മെഷീനിന്റെ മറുപുറത്തുകൂടി പുറത്തെടുക്കാന്‍ സാധിക്കുന്നതാണു.

ഘട്ടം 1.


മുളപ്പിക്കാനാവശ്യമായ ഉയര്ന്ന മേന്മയുള്ള വിത്ത് പ്രത്യേക ലായനിയില്‍ കഴുകി കുതിര്ത്തു വക്കുന്നു.

ഘട്ടം 2.


കുതിര്‍ത്ത വിത്തുകള്‍ മെഷീനിലെ കണ്വേയറില്ക്ക് മാറ്റുന്നു, അടുത്ത ട്രേയില്‍ വിത്തു കഴുകി കുതിര്‍ത്തു വക്കുന്നു.

ഘട്ടം 3.


മുള പൊട്ടിത്തുടങ്ങുന്നു. ട്റേ മുന്നോട്ട് തള്ളിയ ശേഷം തലേ ദിവസത്തെ കുതിര്ത്ത ട്രേ ലോഡ്‌ ചെയുന്നു.

ഘട്ടം 4.


ഘട്ടം 5.


ഘട്ടം 6.


ഘട്ടം 7.


പൂര്‍ത്തിയായ പുല്‍ ട്രേ


ഏഴു ദിവസം കഴിയുന്നതോടെ പുല്ലു തയ്യാറായി.
ട്രെയിലെ പുല്ലു, വേരും സ്റെമും അടക്കം തീറ്റയായി നല്‍കുന്നു.
ഒരു കിലോ ചോള വിത്ത് 8-10 കിലോ വരെ തീറ്റയായി ലഭിക്കുന്നു

കേരളത്തെ പോലെയുള്ള സ്ഥലങ്ങളില്‍ എത്രത്തോളം ലാഭകരം ആകും എന്ന്‍ പഠനങ്ങള്‍ നടക്കേണ്ടിയിരിക്കുന്നു.മിഡില്‍ ഈസ്റ്റില്‍ ഒരു കിലോ പുല്ലു വാങ്ങുന്നതിനേക്കാള്‍ ലാഭകരമായി ഇത് പ്രവര്‍ത്തിപ്പിക്കാം എന്ന് പരീക്ഷിച്ചു ബോധ്യപ്പെട്ടിട്ടുണ്ട്. ഇന്ത്യയില്‍ തന്നെ ഡല്ഹിയിലും രാജസ്ഥാനിലും ഈ യന്ത്രം പ്രവര്ത്തിക്കുന്നുണ്ട്. ഭൂമിയിലെ കൃഷിക്ക് ബദലായി ഇതു ഉയര്‍ന്നു വരാനുള്ള സാദ്ധ്യത അത്ര വിരളമല്ല എന്ന് പറയാന്‍ മാത്രമേ ഈ സമയത്ത് പറയാനാകൂ, കാരണം 460 കിലോ പുല്ലു വീതം ദിനം പ്രതി വിളവെടുക്കാവുന്ന ഒരു മെഷീന്റെ വില 10 ലക്ഷം ഇന്ത്യന്‍ രൂപയുടെ അടുത്തു വരുന്നുണ്ട്.

മെച്ചങ്ങള്‍ :
1. കുറച്ചു സ്ഥലം .
2. കുറച്ച് വെള്ളം
3. കുറഞ്ഞ ജോലി
4. കുറഞ്ഞ സമയം
5. കൂടിയ പോഷക മൂല്യം

കുറിപ്പ് :
ഡല്‍ഹിയില്‍ നടത്തിയ പരീക്ഷണത്തില്‍ ഞാറു തയ്യാറാക്കാന്‍ വിജയകരമായി ഇത് ഉപയോഗിച്ചിട്ടുണ്ട് .

8/14/2009

പന്നിപ്പനിയും ലാബ് ടെസ്റ്റും

രോഗ നിര്‍ണ്ണയ സമ്പ്രദായങ്ങളില്‍ ലാബ് ടെസ്റ്റുകള്‍ക്ക് പ്രമുഖമായ സ്ഥാനമാണുള്ളത്. രോഗലക്ഷണങ്ങള്‍ നിരീക്ഷിച്ച് പ്രാധമിക നിഗമനത്തിലെത്തുകയും ഇതിന്റെ സ്ഥിരീകരണത്തിന് ലാബ് ഫലത്തെ ആശ്രയിക്കുകയുമാണ് പൊതുവെ സ്വീകരിക്കപ്പെടുന്ന രീതി. ഒരേ രോഗലക്ഷണം പ്രകടമാക്കുന്ന വിവിധ രോഗങ്ങളുടെ തരം തിരിവിനും ഫലപ്രദമായ ചികിത്സകള്‍ക്കും ടെസ്റ്റുകള്‍ അത്യന്താപേക്ഷിതമാണ്. ലാബ് ടെസ്റ്റുകള്‍ പലവിധമുണ്ട്, വളരെ ചുരുങ്ങിയ സമയം കൊണ്ട് ഫലം തരുന്നവ മുതല്‍ ആഴ്ചകളോളം നീണ്ടു നില്‍ക്കുന്ന പ്രവര്‍ത്തനങ്ങള്‍ ആവശ്യമുള്ളവ വരെ ഈ വിഭാഗത്തില്‍ ഉള്‍പ്പെടുന്നു. ദൈര്‍ഘ്യമേറിയ ലാബ് പരിശോധനകള്‍ ആവശ്യമുള്ള സാഹചര്യങ്ങളില്‍ ലക്ഷണങ്ങളോ, നിഗമനത്തിലെത്താന്‍ സഹായിക്കാവുന്ന ചില ചെറു ലാബ് പരിശോധകളോ അടിസ്ഥാനപ്പെടുത്തി ചികിത്സ ആരംഭിക്കുകയാണ് പതിവ്. ഉദാഹരണമായി പഴുപ്പു നിറഞ്ഞ ഒരു മാറാ വ്രണം ചികിത്സിക്കാന്‍ പഴുപ്പ് കള്‍ച്ചര്‍ ആന്‍ഡ് സെന്‍സിറ്റിവിറ്റി ടെസ്റ്റിന് അയക്കുകയും, പ്രസ്തുത വ്രണത്തിനു ഫലപ്രദമായേക്കാവുന്ന ഒരു ആന്റി ബയോട്ടിക്ക് ചികിത്സ ആരംഭിക്കുകയും ചെയ്യുന്നു. ലാബിലാവട്ടെ ഇതില്‍ നിന്ന് വേര്‍തിരിച്ചെടുക്കുന്ന അണുക്കള്‍ (ഉണ്ടെങ്കില്‍) അവ ഏതെല്ലാം മരുന്നുകള്‍ക്ക് ഗുണപരമായ രീതിയില്‍ കീഴടങ്ങുന്നുവെന്ന് പരിശോധിക്കപ്പെടുന്നു. ഇതിന്റെ ഫലവും ആദ്യം നല്‍കിയ മരുന്നിന്റെ പ്രവര്‍ത്തനവും നിരീക്ഷിച്ച് ആവശ്യമെങ്കില്‍ ആദ്യ മരുന്ന് മാറ്റുകയോ തുടരുകയോ ചെയ്യാം.

പന്നിപ്പനി എന്നു വിളിക്കപ്പെടുന്ന എച്ച്.വണ്‍.എന്‍.വണ്‍ പനിയിലേക്കുവന്നാല്‍, ഇത് സ്ഥിരീകരിക്കാനുള്ള ലാബ് സജ്ജീകരണങ്ങള്‍ നമ്മുടെ സംസ്ഥാനത്തില്ലെന്നും, മറ്റിടങ്ങളിലയച്ച് പരിശോധന നടത്തി ഫലം ലഭിക്കാനെടുക്കുന്ന കാല താമസം ഗുരുതരമായ പ്രതിസസന്ധി സൃഷ്ടിച്ചിരിക്കുകയുമാണെന്ന രീതിയില്‍ മാദ്ധ്യമങ്ങള്‍ പ്രചരിപ്പിക്കുന്നു. വാസ്തവത്തില്‍ ഇന്ന് കേരളത്തില്‍ പന്നിപ്പനി ചികിത്സയും ലാബ് പരിശോധനാ ഫലങ്ങളും തമ്മില്‍ നേരിട്ട് ബന്ധമൊന്നുമില്ലന്ന് പറയാം. ഈ ധാരണയുടെ അഭാവമാണ് ഇപ്രകാരമുള്ള പ്രചരണങ്ങളുടെ അടിസ്ഥാനം. പന്നിപ്പനിയെ ഒരു മഹാമാരിയായ് ലോകാരോഗ്യ സംഘടന പ്രഖ്യാപിച്ചിട്ടുള്ള സാഹചര്യത്തില്‍ "പന്നിപ്പനി" എന്ന പദത്തിന്റെ നിര്‍വ്വചനം സാധൂകരിക്കാന്‍, ഈ ലാബ് പരിശോധനാ ഫലം കൂടിയേ തീരൂ. ഈ സാങ്കേതിക പൂര്‍ത്തിയാക്കാനാണ് വാസ്തവത്തില്‍ ഇന്ന് കേരളത്തിലെ സാമ്പിളുകള്‍ ലാബിലേക്ക് അയക്കപ്പെടുന്നത്. നിലവിലുള്ള നിര്‍ദ്ദേശങ്ങളനുസരിച്ച്, ഒരു പ്രദേശത്ത് ഇന്‍ഫ്ലുവെന്‍സാ പോലെയുള്ള രോഗലക്ഷണങ്ങള്‍ (ഐ.എല്‍.ഐ) കാണപ്പെട്ടാല്‍ സാമ്പിളുകള്‍ വിശദപരിശോധനക്ക് അയക്കേണ്ടതുണ്ട്. ലക്ഷണങ്ങള്‍ പന്നിപ്പനിയിലേക്ക് വിരല്‍ ചൂണ്ടുന്ന പക്ഷം,ലാബ് പരിശോധന ഫലം വരുന്ന വരെ കാത്തിരിക്കാതെ നേരിട്ട് രോഗചികിത്സയിലേക്ക് നീങ്ങുന്നതിന് തടസ്സവുമില്ല. ഒരിക്കല്‍ ഒരു പ്രദേശത്ത് പന്നിപ്പനി സ്ഥിരീകരിച്ച് കഴിഞ്ഞാല്‍ ഇപ്രകാരം ഐ.എല്‍.ഐ ആയി വരുന്ന രോഗികളെ "പന്നിപ്പനി സംശയിക്കുന്നവര്‍" ആയി കണക്കാക്കി ചികിത്സ നല്‍കേണ്ടതാണ്. കേരളം പന്നിപ്പനി ബാധിത പ്രദേശമായി സ്ഥിരീകരിച്ച സാഹചര്യത്തില്‍, അയച്ച സാമ്പിളിന്റെ ലാബ് ടെസ്റ്റ് ഫലത്തിനു കാക്കാതെ നേരിട്ട് ചികിത്സ ആരംഭിക്കാവുന്നതാണ്. ചുരുക്കത്തില്‍ ലാബ് പരിശോധനാ ഫലം ചികിത്സയെ ബാധിക്കുന്നില്ല എന്നര്‍ത്ഥം.

എന്നിരുന്നാലും കേന്ദ്രസംഘം ഇന്ന് കേരളത്തിലെത്തി അടിയന്തിരമായി ലാബ് തുടങ്ങാനുള്ള അനുമതി നല്‍കും എന്ന് പ്രതീക്ഷിക്കപ്പെടുന്നു.
ചിത്രത്തിനു കടപ്പാട്: ഗൂഗിള്‍

8/11/2009

പകര്‍ച്ചപ്പനി തടയാന്‍ ഹോമിയോ

കേരളമെമ്പാടും പനി പടരുന്ന വാര്‍ത്തകളുമായാണ് ദിനം പ്രതിയുള്ള വര്‍ത്തമാനപ്രത്രങ്ങള്‍ പുറത്തിറങ്ങുന്നത്. ഡെങ്കി, ചിക്കുണ്‍, തക്കാളി, മറ്റു പനികള്‍; വിവിധ ഇനങ്ങള്‍ വിവിധ പേരുകളില്‍. ഈ വാര്‍‍ത്തകള്‍ക്ക് മേമ്പൊടിയിടാനായി എച്ച്.വണ്‍ എന്‍.വണ്‍ പനി ഭീതിയും മരണ റിപ്പോര്‍ട്ടുകളും കൊടുക്കാനും പത്രങ്ങള്‍ മറക്കുന്നില്ല.ദിവസേന വരുന്ന വാര്‍ത്തകളാല്‍ ചകിതരായ ജനങ്ങള്‍ ചെറു പനി വരുമ്പോള്‍ തന്നെ ജീവമോഹത്താല്‍ മള്‍ട്ടി സ്പെഷ്യാലിറ്റി ആശുപത്രികളിലേക്ക് പായുന്നു. വൈറസ് ബാധയാലുള്ള പനിക്ക് കാര്യമായ ചികിത്സ നല്‍കപ്പെടുന്നില്ല എന്നത് വാസ്തവമാണെന്നിരിക്കെ പനി തടയാനുള്ള ശ്രമങ്ങള്‍ കേവലം കുപ്പത്തൊട്ടി ശുചീകരണത്തിലും ക്ലോറിന്‍ കലക്കലിലും ഒതുങ്ങുന്നു.

പനിപ്രതിരോധത്തിന് ഹോമിയോ:
പനികള്‍ക്ക് പ്രത്യേകിച്ച് ഏറ്റവും ഫലപ്രദമായ മരുന്നുകള്‍ നല്‍കുന്ന ചികിത്സാ സമ്പ്രദായമാണ് ഹോമിയോപ്പതി. കേരള സര്‍ക്കാരിന്റെ ഹോമിയോപ്പതി വകുപ്പ് പനി പ്രതിരോധത്തിനും പനിചികിത്സക്കും വിവിധങ്ങളായ പദ്ധതികളുമായി ഇന്ന് പ്രവര്‍ത്തന നിരതമാണ്. പനി ചികിത്സയേക്കാള്‍ ഫലപ്രദമായി പ്രതിരോധത്തിന് ഹോമിയോ മരുന്ന് ഉപയോഗിക്കപ്പെടുന്നുമുണ്ട്. കേരളത്തിലെ ഏതാണ്ടെല്ലാ പഞ്ചായത്തിലും ഇന്ന് ഹോമിയോ ആശുപത്രികള്‍ പ്രവര്‍ത്തിക്കുന്നു. വിവിധ സ്ഥലങ്ങള്‍ കേന്ദ്രീകരിച്ചുള്ള ക്യാമ്പുകള്‍, ആശുപത്രിയില്‍ നിന്നും നേരിട്ടുള്ള ചികിത്സ എന്നിവ ലഭ്യമാണ്. ഒരോ പ്രദേശങ്ങളിലേയും ജനങ്ങളുടെ ആവശ്യാനുസരണം അതത് ഗ്രാമപഞ്ചായത്തുകളുടെ സഹകരണത്തോടെയാണ് ക്യാമ്പുകള്‍ നടത്തപ്പെടുന്നത്.

ചില ദുഷ്പ്രചരണങ്ങള്‍:
ഹോമൊയോ ചികിത്സ ഒരു കപട ചികിത്സാ സമ്പ്രദായമാണെന്ന പ്രചരണം കാലാകാലങ്ങളായി ഈ മേഖല നേരിട്ടുകൊണ്ടിരിക്കുന്നതാണ്. നൂറു ശതമാനം രോഗങ്ങളും ഹോമിയോ മരുന്നുകളാല്‍ ഭേദപ്പെടുത്താനാവും എന്ന് കരുതുന്നില്ലെങ്കിലും സാമാന്യേന ഭേദപ്പെട്ട രോഗ ശാന്തി നല്‍കാനിതിന് കഴിയുന്നു എന്ന് അനുഭവസ്ഥര്‍ സാക്ഷ്യപ്പെടുത്തും. എന്നാലിന്ന് കേരളത്തിലെ ജനങ്ങളാകമാനം തെറ്റിദ്ധരിപ്പിക്കപ്പെട്ടുകൊണ്ടിരിക്കുന്നു എന്ന് പറയാതെ വയ്യ. പനി ബാധിച്ചാല്‍‍ പ്രൈമറി ഹെല്‍ത്ത് സെന്റര്‍ (അലോപ്പതി) തന്നെ അത് ചികിത്സിക്കണമെന്ന വ്യാപകമായ പ്രചാരണം നടക്കുന്നു. കേരള സര്‍ക്കാരിന്റെ തന്നെ ഒരു വകുപ്പ് ഈ പ്രചാരണം നല്‍കുക മൂലം സധാരണക്കാരന്‍ വഴിതെറ്റുന്നു എന്ന് തന്നെ പറയാം.പനിബാധയുണ്ടായാല്‍ വിദഗ്ധ സേവനം തേടുക എന്നൊരു ഉപദേശമായിരുന്നു ജനങ്ങള്‍ക്ക് നല്‍കേണ്ടിയിരുന്നത്.

ഇനി ചെയ്യാവുന്നത്:
പനി ബാധയെ പ്രതിരോധിക്കാനാവശ്യമായ മരുന്നുകള്‍ കഴിക്കുക, എല്ലാ സര്‍ക്കാര്‍ ഹോമിയോ ആശുപത്രികളിലും ഇത് ലഭ്യമാണ്. എല്ലാ വൈറസ് പനി ബാധകളെയും തടയാനാവും എന്നതില്‍ എച്ച്.വണ്‍.എന്‍.വണ്‍ പനിയും ഉള്‍പ്പെടുന്നു എന്ന് പ്രത്യേകം കൂട്ടിച്ചേര്‍ക്കേണ്ട ആവശ്യമില്ലല്ലോ. പനി ബാധയുള്ള പ്രദേശങ്ങളില്‍ ഈ മരുന്നുകളെക്കുറിച്ച് ബോധവല്‍ക്കരണം നടത്തുക, മാദ്ധ്യമങ്ങളടക്കം ഈ വിഷയത്തില്‍ ജനങ്ങളുടെ പക്ഷത്തു നില്‍ക്കുക.

പ്രവാസി സുഹൃത്തുക്കള്‍ നാട്ടില്‍ വരുന്നതിനു മുമ്പ് ഈ മരുന്ന് ലഭ്യമാക്കാന്‍ സാധിക്കുന്ന പക്ഷം, ഒരു കോഴ്സ് മരുന്ന് കഴിച്ച ശേഷം നാട്ടില്‍ വരുന്നത് നന്നായിരിക്കും.ഇല്ലാത്ത പക്ഷം നാട്ടിലെത്തിയാല്‍ ഇത് കഴിക്കാന്‍ ശ്രമിക്കുക.

കേരളത്തില്‍ നിലവില്‍ പനി ബാധയുള്ള വീടുകളിലെ മറ്റംഗങ്ങള്‍ പ്രതിരോധത്തിനായ് മരുന്ന് കഴിക്കുക.

അലോപ്പതി ചികിത്സക്കു ശേഷം രോഗം മാറുകയും എന്നാല്‍ കൈകാല്‍ വേദന , സന്ധി വേദന എന്നിവ നിലനിക്കുന്ന ആളുകള്‍ക്ക് ഹോമിയോ അശുപത്രികളെ സമീപിക്കാവുന്നതാണ്.സന്ധി വേദനയില്‍ നിന്നും ത്വരിത ഗതിയിലുള്ള വിടുതല്‍ ലഭിക്കുന്നതായ് വകുപ്പ് സാക്ഷ്യപ്പെടുത്തുന്നുണ്ട്.
കുറിപ്പ്:
സര്‍ക്കാരിതര ഹോമിയോ ചികിത്സകരെ സമീപിക്കുമ്പോള്‍ യഥാര്‍ത്ഥ യോഗ്യതകള്‍ ഉള്ളവരാണെന്ന് ഉറപ്പുവരുത്തുക.

6/07/2009

കല്ലാനയെന്ന സാങ്കല്‍പ്പിക ജീവി

ആനകളെക്കുറിച്ച് നിരവധി ലേഖനങ്ങള്‍ അച്ചടി മാദ്ധ്യമങ്ങളിലും ബ്ലോഗിലും പലപ്പോഴായി വന്നിട്ടുണ്ടെങ്കിലും അധികം പരാമര്‍ശിക്കപ്പെട്ടിട്ടില്ലാത്ത ഒരു പേരാണ് കല്ലാന. കഴിഞ്ഞൊരു പോസ്റ്റില്‍ നടന്ന ചര്‍ച്ചയില്‍ അനില്‍ശ്രീയാണ് കല്ലാനയെ ആദ്യമായി എന്റെ ശ്രദ്ധയില്‍ പെടുത്തുന്നത്.
ആനകള്‍ ഏഷ്യന്‍ ആനകള്‍ ആഫ്രിക്കന്‍ ആനകള്‍ എന്ന രണ്ട് വ്യസ്ത്യസ്ഥ വിഭാഗങ്ങളാണെന്ന് നാം കണ്ടു കഴിഞ്ഞു. ഏഷ്യന്‍ ആനകള്‍ ശരാശരി 3-5 ടണ്‍ ഭാരവും 2-3 ഉയരവുള്ള ജീവികളാണ്, ഇതില്‍ തന്നെ ആണ്‍ പെണ്‍ വ്യത്യാസങ്ങള്‍ ദൃശ്യമാണ്. എന്നാല്‍ മലേഷ്യയിലെ ബോര്‍ണിയോയില്‍ കാണപ്പെടുന്ന ചെറിയ ആനകള്‍ ശാസ്ത്ര ലോകത്തിന്റെ ശ്രദ്ധയാകര്‍ഷിച്ചു. ഉയരം ഏദേശം രണ്ടുമീറ്റര്‍, കാഴ്ചയില്‍ കുട്ടിയാനകളുടെ മുഖവും വലിയ ചെവികളും, നിലത്തിഴയുന്ന വാല്‍ എന്നിവ ഇവയെ മറ്റ് ഏഷ്യനാനകളില്‍ നിന്നും മാറ്റി നിര്‍ത്തുന്നു. ദ്വീപിലൊറ്റപ്പെട്ടുപോയ നാട്ടനകളുടെ ഒരു അവാന്തര വിഭാഗമായി അടുത്തിടെ വരെ കണക്കാക്കപ്പെട്ടിരുന്ന ഇവയുടെ ഡി.എന്‍.ഏ പഠനങ്ങള്‍, 2003ഇല്‍ നടത്തുകയുണ്ടായി. ഈ ഫലങ്ങള്‍ കാണിക്കുന്നത് ഏഷ്യന്‍ ആനകളില്‍ നിന്നും വ്യത്യസ്ഥമായ ഒരു വിഭാഗമായി ഇവയെ പരിഗണിക്കാമെന്നും പരിണാമ പ്രകൃയയില്‍ വേറിട്ടു തന്നെ വന്ന ഒരിനം ആവാം എന്നതുമാണ്. എന്നാല്‍ ഔദ്യോഗികമായി ഇതിന് സ്ഥിരീകരണം ലഭിച്ചിട്ടില്ലെന്നാണ് അറിവ്. ഈ ആനകളെ പിഗ്മി ആനകള്‍ (pigmy elephants)വിളിച്ചുവരുന്നു, കുള്ളന്‍ ആനകള്‍ എന്ന അര്‍ത്ഥത്തില്‍.


ഉയരം കുറഞ്ഞ കുള്ളന്‍ ആനകള്‍ നമ്മുടെ വനങ്ങളില്‍ വസിച്ചിരുന്നതായി അഗസ്ത്യാര്‍കൂടത്തിലെ ഗോത്രവര്‍ഗ്ഗക്കാര്‍ അവകാശപ്പെടുന്നുണ്ട്. കല്ലാന എന്ന് വിളിക്കപ്പെടുന്ന ഈ ആനകളെ കണ്ടതായി ചില ട്രെക്കര്‍മാരും അവകാശപ്പെടുന്നു, കല്ലാനയുടെതെന്ന് എന്നവകാശപ്പെട്ട് ചില ചിത്രങ്ങളും നമുക്ക് ലഭ്യമാണ്. വന്യജീവി ഫോട്ടോഗ്രാഫറായ ശ്രീ.സാലിയാണ് ഈ ഫോട്ടോ എടുത്തത്. ഈ പ്രചരണങ്ങളുടെ നിജസ്ഥിതി അറിയുന്നതിലേക്കായി, കേരള വനം വകുപ്പും കേരള ഫോറസ്റ്റ് റിസര്‍ച്ച് ഇന്‍സ്റ്റിറ്റ്യൂട്ടും സംയുക്തമായി നടത്തിയ പഠനത്തിലും തിരച്ചിലിലും ഒരു കല്ലാനയെപ്പോലും കണ്ടെത്താന്‍ കഴിഞ്ഞില്ല.

കല്ലാനയുടേതെന്ന് പറയപ്പെടുന്ന ചിത്രങ്ങളെല്ലാം ഒരു ആന മാത്രമുള്ളതായതിനാല്‍ കൃത്യമായൊരു തീരുമാനമെടുക്കാനാവില്ല എന്നാണ് വിദഗ്ധരുടെ നിലപാട്. കുട്ടികളും മുതിര്‍ന്നവരുമടങ്ങുന്ന വിവിധ പ്രായത്തിലുള്ള ഒരു കൂട്ടത്തെ ലഭിച്ചാല്‍ മാത്രമേ കണ്ടെത്തുന്ന ആന യഥാര്‍ത്ഥ കല്ലാനയാണോ എന്ന നിജപ്പെടുത്താനാവൂ. മാത്രവുമല്ല ലഭിച്ച ചിത്രങ്ങളെല്ലാം തന്നെ കൊടും വേനല്‍ക്കാലത്ത് എടുക്കപ്പെട്ടവയാണെന്നും പത്തോ പന്ത്രണ്ടോ വയസ്സുള്ള ക്ഷീണാവസ്ഥയിലുള്ള ഒരു സാധാരണ ആന മാത്രമാവുമെന്നുമാണ് സംസ്ഥാന വനം വകുപ്പ് നിരീക്ഷിക്കുന്നത്. കേരള വനത്തെപ്പോലെ ഇത്രമാത്രം പഠനം സാദ്ധ്യമാകുന്ന ഒരു പ്രദേശത്ത്, ആരുടെ ദൃഷ്ടിയിലും പെടാതെ ഒരു കൂട്ടത്തിന് കഴിയാനാവില്ല എന്നത് കണക്കിലെടുക്കാതെ വയ്യ. എങ്കിലും ആര്യങ്കാവ് മുതല്‍ പാറശാല വരെയുള്ള സ്ഥലത്താണ് ശ്രദ്ധ കേന്ദ്രീകരിക്കുന്നതെന്നും ഇത്തരം ചെറിയൊരാനയെ കണ്ടെത്തിയാല്‍ അതിന്റെ ഡി.എന്‍.എ പരിശോധക്ക് തയ്യാറായിരിക്കുകയാണ് സംസ്ഥാന വനം വകുപ്പ് എന്നും ചുമതലയുള്ള വെറ്ററിനറി ഓഫീസര്‍ ഡോക്ടര്‍. ഈശ്വരന്‍ പറയുണ്ടായി.

കല്ലാന എന്നത് പണ്ട് നമ്മുടെ കാട്ടിലുണ്ടായിരുന്നു എന്നും, പല ജീവി വര്‍ഗ്ഗങ്ങളും നഷ്ടമായപോലെ നാമാവശേഷമായെന്നും വിശ്വസിക്കുന്ന വിദഗ്ധരും കുറവല്ല. കൂടുതല്‍ തെളിവു ലഭിക്കുന്നതുവരെ ഇതൊരു സങ്കല്‍പ്പമാണെന്ന തീരുമാനത്തിലെത്താനെ നമുക്കാവൂ.

5/31/2009

നാട്ടറിവുകളും കേട്ടറിവുകളും

നിത്യേയേനെയെന്നൊണം നാം കേള്‍ക്കുന്ന പദങ്ങളിലൊന്നാണ് നാട്ടറിവുകള്‍ എന്നത്. ദിനപ്പത്രങ്ങളിലും ആനുകാലികങ്ങളിലുമെന്നുവേണ്ട ഇന്ന് ബ്ലോഗിലും നിറയുകയാണ് ഈ പദവും അനുബന്ധ ചര്‍ച്ചകളും. വായ്മൊഴിയായ് തലമുറ കൈമാറിക്കിട്ടിയ പൂര്‍വ്വിക സമ്പത്താണ് നാട്ടറിവുകള്‍ എന്നാണ് പറയപ്പെടുന്നത്. നിത്യജീവിതത്തില്‍ കടന്നുവരുന്ന വസ്തുക്കളാണ് ഇതില്‍ പരാമര്‍ശ വിഷയമാവുന്നതെന്നതില്‍ നാമതില് ആകൃഷ്ടരാവുകയും ചെയ്യും. എന്നാല്‍ ലഭിക്കുന്ന വിവരങ്ങളുടെ ആധികാരികത പരിശോധിക്കാനവസരം ലഭിക്കുന്നില്ല എന്നത് ഇവയുടെ മുഖ്യ പോരായ്മകളിലൊന്നാണ്. ബ്ലോഗ് പോലെയുള്ള ഇന്നിന്റെ മാധ്യമങ്ങളില്‍ ഇത്തരം അറിവുകള്‍ ചര്‍ച്ച ചെയ്യപ്പെടുന്നത് പ്രോത്സാഹിപ്പിക്കപ്പെടേണ്ടതാണ്. ഇത്തരം ചര്‍ച്ചകളിലൂടെ ലഭ്യമാകുന്ന അറിവുകള്‍ സമ്പുഷ്ടമാവുകയും ഭാവിതലമുറക്ക് ഉപകാരപ്രദമാവുകയും ചെയ്യും.

അടുത്തിടെ പ്രത്യക്ഷപ്പെട്ട സ്വാസ്ഥ്യം എന്നൊരു ബ്ലോഗ്ഗ് ഈ ദിശയില്‍ ആരംഭിച്ച പ്രവര്‍ത്തനത്തിന്റെ ഭാഗമാണെന്ന് ഒരുവേള അഹ്ലാദിച്ചതായിരുന്നു. പക്ഷെ ആദ്യ പോസ്റ്റില്‍ തന്നെ പരാമര്‍ശിച്ചിരിക്കുന്ന വിഷയങ്ങളെല്ലാം തെറ്റിദ്ധാരണാജനകമായി എന്നത് പ്രതീക്ഷകള്‍ക്ക് മങ്ങലേല്‍പ്പിച്ചു. സ്വാസ്ഥ്യത്തില്‍ പറയുന്ന ഒന്നാമത്തെ പൊടിക്കൈ ഉലുവ കഴിക്കുന്നതിലൂടെ പ്രമേഹ രോഗത്തെ ഉന്മൂലനം ചെയ്യാമെന്നതായിരുന്നു. വാഗ്പ്രയോഗത്തില്‍ പ്രതിഫലിക്കുന്ന അതിശയോക്തി തന്നെ ഈ പ്രസ്താവന തെറ്റെന്ന് ബോദ്ധ്യപ്പെടാന്‍ പര്യാപ്തമാണ്. അതിന്മേല്‍ തന്നെ അതിശക്തമായ വിമര്‍ശനമേറ്റു വാങ്ങുകയും, നാട്ടറിവുകള്‍ തന്നെ പൊളികളാണെന്ന പരാമര്‍ശങ്ങള്‍ക്ക് ഇടയാക്കുകയും ചെയ്തു.ഒരോട്ട പ്രദക്ഷിണം നടത്തിയതില്‍, ഈ സൈറ്റില്‍ പറയുന്നത് ഉലുവക്ക് പ്രമേഹ രോഗത്തെ മാറ്റാനുള്ള കഴിവുണ്ടെന്നതാണ്. എന്നാല്‍ ഈ പഠനം കാണുക, പരീക്ഷണശാലയില്‍ ,എലികളില്‍ നടത്തിയ പരീഷണങ്ങള്‍ ഈ സാദ്ധ്യത തള്ളിക്കളയുന്നു. ഉലുവക്ക് പ്രമേഹവുമായി കാര്യമായ ബന്ധങ്ങളില്ലെന്ന് അനുമാനത്തിലെത്തേണ്ടി വരും. തുടര്‍ന്ന് വരുന്ന ഒരോ വിദ്യയും നാട്ടറിവുകള്‍ക്ക് പേരുദോഷമാവുന്നുവെന്ന് സംശയിക്കണ്ടിയിരിക്കുന്നു. ഉലുവയുടെ ഔഷധഗുണങ്ങളെപ്പറ്റി ധാരാളം ഗ്രന്ഥങ്ങളില്‍ പരാമര്‍ശിക്കപ്പെട്ടിട്ടുണ്ട്, ഇന്റര്‍നെറ്റിലും. പലതിനും അനുകൂലമായ റഫറന്‍സുകളും ലഭ്യമാണെന്ന് കരുതുന്നു, ഉലുവാക്കഞ്ഞിയും മറ്റും നമ്മുടെ നാട്ടില്‍ പ്രചാരത്തിലുള്ളതാണല്ലോ.

പ്രകൃതിദത്ത ഔഷധങ്ങളും മൃഗ ചികിത്സയും.

മനുഷ്യ ചരിത്രത്തോളം തന്നെ പഴക്കം കാണും രോഗചികിത്സാ ശ്രമങ്ങള്‍ക്കെന്നു കരുതാം. മറ്റേതൊരു മേഖല പോലെയും ശാസ്ത്രത്തിന്റെ വളര്‍ച്ചയോടോപ്പം വളര്‍ന്ന് ചികിത്സാ രംഗം ഇന്ന് മനുഷ്യരാശിയുടെ ജീവന്‍ നിലനിര്‍ത്തുന്നു. മനുഷ്യ ചരിത്രത്തിലെ ഏടുകളില്‍ ചിലതാണല്ലോ ലോഹങ്ങളുടെ കണ്ടുപിടുത്തം. നൂറ്റാണ്ടുകള്‍ക്ക് മുമ്പ് കണ്ടത്തിയവയാണെന്ന് കരുതി ഇരുമ്പും ചെമ്പും നാമിന്ന് ഉപയോഗിക്കാതിരിക്കുന്നില്ല. കൂടുതല്‍ സങ്കീര്‍ണ്ണമായ ആവശ്യങ്ങള്‍ക്ക് ലോഹസങ്കരങ്ങള്‍ ഉപയോഗിക്കുന്നു എന്നുമാത്രം. ഇതിനു സമാനമായി ഔഷധ പ്രയോഗത്തേയും കണക്കാക്കാം എന്നാണ് വ്യക്തിപരമായി എന്റ്റെഅഭിപ്രായം. പ്രകൃതിയില്‍ നിന്നും നേരിട്ട് സംഭരിച്ച് നിശ്ചിത രൂപത്തിലാക്കുന്ന ഔഷധങ്ങള്‍ ഗാലനിക്കല്‍ മരുന്നുകള്‍ എന്ന് അറിയപ്പെടുന്നു. കഴിഞ്ഞ ചില പതിറ്റാണ്ടുകള്‍ക്ക് മുമ്പ് വരെ മനുഷ്യ ചികിത്സയിലും ഉപയോഗിച്ചിരുന്ന ഇത്തരം മരുന്നുകള്‍ ഇപ്പോഴും മൃഗ ചികിത്സാരംഗത്ത് വ്യാപകമായി ഉപയോഗിക്കുന്നു. നമ്മുടെ സര്‍ക്കാര്‍ മൃഗാശുപത്രികളില്‍ ലഭ്യമായ മരുന്നുകള്‍ പകുതിയിലേറെയും ഇത്തരം മരുന്നുകളാണ്. വ്യത്യസ്ഥമായ മരുന്നുകളുടെ വിവിധ അനുപാതത്തിലുള്ള കൂട്ടുകള്‍ തയ്യാറാക്കി വിവിധങ്ങളായ രോഗങ്ങള്‍ക്ക് നല്‍കിവരുന്നു. കൂടുതലായ രാസ/വ്യാവസായിക പ്രക്രിയകള്‍ പ്രയോഗിക്കാതെ ലഭ്യമാകുന്ന ഇത്തരം മരുന്നുകളുടെ കുറഞ്ഞ വിലയും, ചികിത്സകന്റെ ആവശ്യാനുസരണം തയ്യാറാക്കാമെന്നതും ഈ മരുന്നുകളെ ഇന്നും നമ്മുടെ ചികിത്സാ രംഗത്ത് നിലനിര്‍ത്തുന്നു.

നാട്ടറിവുകളെന്ന് പരാമര്‍ശിച്ച് നമുക്ക് മുന്നിലെത്തുന്ന ഔഷധങ്ങളില്‍ പലതും ഇത്തരത്തില്‍ ഗാലനിക്കല്‍ മരുന്നുകളായുണ്ട് എന്നത് പരിശോധനക്ക് വഴിതുറക്കുന്നു. അയമോദകം,ആടലോടകം, ഇഞ്ചി, ഇരട്ടിമധുരം, ഉപ്പുകള്‍, ഏലക്കായ് സത്ത്, കറുപ്പ്,കായം,ഗന്ധകം, ചുക്ക്,ജീരകം,തുരിശ് തുടങ്ങിയ നീണ്ട നിര ചില ഉദാഹരണങ്ങള്‍ മാത്രം. ഇത്തരത്തില്‍ നമ്മുടെ അറിവുകള്‍ പഠനങ്ങളുമായ് സംയോജിപ്പിക്കാനുള്ള ശ്രമങ്ങള്‍ കഴിവുള്ള ബൂലോകരില്‍ നിന്നും ഉയര്‍ന്നു വരേണ്ടതുണ്ട്. ഔഷധ സസ്യങ്ങള്‍ക്കായ് ആധികാരികമായൊരു ഒരു ബ്ലോഗ്ഗ് ആരെങ്കിലും തുറക്കും എന്ന ആശിക്കുന്നു, കേരള ഇന്നവേഷന്‍ ഫൌണ്ടേഷന്റെ ശ്രമങ്ങള്‍ കാണായ്കയല്ല, കൂടുതല്‍ ചര്‍ച്ചകള്‍ക്കൊരു വേദിയാവട്ടെ എന്ന ആഗ്രഹം മാത്രം.

5/11/2009

പന്നിയിറച്ചി ഒഴിവാക്കാം

പന്നിമാംസം

മാസം എന്നത് നമ്മുടെ ഭക്ഷ്യ വസ്തുക്കളില്‍ ഒഴിച്ചു കൂടാനാവാത്ത ഒന്നായി മാറിയിരിക്കുന്നു. വര്‍ദ്ധിച്ചു വരുന്ന ആ‍വശ്യകത മുന്‍ നിര്‍ത്തി കുറഞ്ഞ ചിലവില്‍ കൂടുതല്‍ മാംസം ഉത്പാദിപ്പിക്കുന്ന തരത്തിലുള്ള സാങ്കേതിക വിദ്യകള്‍ വികസിപ്പെച്ചെടുക്കുകയാണ് ശാസ്ത്രമിന്ന്. കൂടുതല്‍ വളര്‍ച്ചാ നിരക്ക് കാഴ്കവക്കുന്ന ജന്തു വര്‍ഗ്ഗങ്ങള്‍ ഈ മേഖലിയില്‍ വളര്‍ത്തപ്പെടുന്നതിന് ഇത് വഴിവക്കുന്നു. ഇതിന്റെ പ്രത്യക്ഷ ഉദാഹരണമാണ് പന്നി. താഴെക്കൊടുത്തിരിക്കുന്ന ടേബിള്‍ പരിശോധിക്കാം.
പന്നിമാംസം (മൊത്തം) ബീഫ്, കോഴി, ടര്‍ക്കി എന്നിവയുമായുള്ള താരതമ്യമാണ് ഇത്. കലോറി മൂല്യം വളരെ കൂടുതലായുള്ള പന്നിമാംസത്തില്‍ പ്രോട്ടീന്‍ അളവു ഏറ്റവും കുറവാണെന്നതും കൊഴുപ്പിന്റെ അളവ് അധികമാണെന്നതും ശ്രദ്ധിക്കുക. ഈ ഘടകങ്ങളാവട്ടെ നമ്മുടെ ആരൊഗ്യ പരിരക്ഷയുടെ കാര്യത്തില്‍ ദോഷകരമായി വിലയിരുത്തപ്പെടാം എന്നാണ് കരുതേണ്ടത്. ഇതൊരു പുതിയ കണ്ടെത്തലല്ലെന്നിരിക്കെ പന്നി മാസം എന്തുകൊണ്ട് വിപണിയില്‍ മുന്നിട്ടു നില്‍ക്കുന്നു എന്ന പരിശോധിക്കാം.

എന്തുകൊണ്ട് പന്നി വളര്‍ത്തപ്പെടുന്നു?

കുറഞ്ഞ സമയത്തിനുള്ളില്‍ (ഏകദേശം 6 മുതല്‍ 9 മാസം വരെ കാലയളവ് ), 50 മുതല്‍ 90 കിലോഗ്രാം ശരീരഭാരം ആര്‍ജ്ജിക്കുന്നു എന്നുള്ളത് തന്നെയാണ് ഈ വിഭാഗത്തിന്റെ മുഖ്യ സവിശേഷത. ഏറ്റവും മോശമായ തീറ്റ സാധങ്ങള്‍ പോലും ഭക്ഷിച്ച് കൂടുതല്‍ കലോറി മൂല്യം തരുന്ന മറ്റൊരു ജന്തു വിഭാഗം ഇല്ല തന്നെ. നമ്മുടെ നാട്ടില്‍ പന്നിത്തീറ്റയുടെ 60 ശതമാനത്തോളം ഹോട്ടല്‍ അവശിഷ്ടങ്ങളും പച്ചക്കറി അവശിഷ്ടങ്ങളുമാണെന്നത് ഏവര്‍ക്കും അറിയാവുന്ന വസ്തുതയാണ്. കേരളത്തിലെ പ്രത്യേക സാഹചര്യം പരിഗണിച്ചാല്‍ പൂര്‍ണ്ണമായും സമീകൃത തീറ്റ നല്‍കിയുള്ള പന്നിവളര്‍ത്തല്‍ സാദ്ധ്യമല്ലെന്നതും ഓര്‍മ്മവക്കുക.

ഒറ്റ പ്രസവത്തില്‍ ഏകദേശം മുക്കാല്‍ ഡസന്‍ കുഞ്ഞുങ്ങളാണ് ഒരു പന്നിക്ക് ജനിക്കുന്നത്. ഒരു വ്യവസായം എന്ന നിലയില്‍ പന്നിയെ മാറ്റിയെടുക്കുന്നതില്‍ ഇത് മുഖ്യ പങ്ക് വഹിക്കുന്നു. 10 പന്നികളുള്ള ഒരു കൂട്ടത്തില്‍ നിന്നും ഒരു പ്രസവം കൊണ്ട് ലഭ്യമാകുന്ന മാസത്തിന്റെ ആകെ അളവ് കണക്കാക്കി നോക്കിയാലിത് ബോദ്ധ്യപ്പെടും.

ഏറ്റവും കൂടിയ ഡ്രസ്സിംങ് ശതമാനം നല്‍കുന്ന ജന്തു വര്‍ഗ്ഗമാണ് പന്നി. മൊത്തം ശരീര ഭാരത്തില്‍ നിന്നും ലഭിക്കുന്ന ഭക്ഷ്യയോഗ്യമായ മാസത്തിന്റെ ശതമാനമാണ് ഇത്. എഴുപത് ശതമാനം എന്ന മൂല്യം, ഇതര വിഭാഗങ്ങളായ കന്നുകാലികള്‍ (50 ശതമാനം), കോഴി (55 ശത്തമാനം) വളരെ ഉയര്‍ന്ന ഒന്നാണ്.

ഒരു വ്യവസായം എന്ന നിലയില്‍ പന്നി വളര്‍ത്തല്‍ എന്തുകൊണ്ട് മുന്നിട്ടു നില്‍ക്കുന്നു എന്ന് വ്യക്തമാവാന്‍ ഈ ചുരുങ്ങിയ കാരണങ്ങള്‍ മതിയാവും.

നമ്മുടെ ഇഷ്ടാനുഷ്ടങ്ങള്‍ വിപണിയാണിന്ന് തീരുമാനിക്കുന്നത്. നാം ഏതു തരം ഭക്ഷണം തിരഞ്ഞെടുക്കണമന്നത് ലോക മാസ മുതലാളിമാരാണ് തീരുമാനിക്കുന്നത്. അതിനാല്‍ തന്നെ ഏറ്റവും ലാഭം തരുന്ന പന്നിയിറച്ചി വിറ്റഴിക്കപ്പെടണം എന്നത് അവരുടെ തീരുമാനമാണ്.

പന്നിയും മനുഷ്യനും

ലോകമെമ്പാടും പുതിയ രോഗങ്ങള്‍ ഉയര്‍ന്നു വരുന്ന ഈ സാഹചര്യത്തില്‍ ഭക്ഷണ കാര്യത്തിലെങ്കിലും നമുക്ക് സ്വയം ചിന്തിക്കാനാവുമോ എന്ന് വിലയിരുത്തുക. ഈ സീരിസിലെ ഏറ്റവും പുതിയ അവതാരമായ H1N1 എന്ന പനി പന്നിയില്‍ നിന്നാണ് വന്നതെന്ന് ഗവേഷകര്‍ പറയുന്നു. പന്നിപ്പനി എന്നു പേരിട്ടു വിളിച്ച ഈ രോഗത്തിന്റെ പേരില്‍ നിന്നും പന്നി എന്ന പദം ഒഴിവാക്കപ്പെട്ടതു തന്നെ ലോക വ്യവസായികളുടെ ശക്തി വെളിവാക്കുന്നു. പനി മാരകമായ മഹാമാരിയായി ലോകത്താകമാ‍നം പടര്‍ന്നതിന്റെ ചില സൂചനകള്‍ കാണുക. ഇവയിലെല്ലാം നിര്‍ണ്ണായക പങ്കു നല്‍കിയ ജീവികൂടിയാണ് പന്നി.

പന്നിയും മനുഷ്യനും തമ്മിലെന്ത് എന്നൊരു പോസ്റ്റില്‍ മുന്‍പ് സൂചിപ്പിച്ചതുപോലെ ഈ രണ്ടു ജന്തു വിഭാഗങ്ങള്‍ തമ്മിലുള്ള ജൈവികമായ സാമ്യത ഇനിയും നിരവധി രോഗങ്ങള്‍ ഉയര്‍ന്നു വരുവാന്‍ കാരണമായേക്കാം.

ഒരു ജൈവ മിക്സര്‍ ആയി തന്നെ പന്നിയെ കണക്കാക്കേണ്ടതാണ്, ഒരു ജൈവ ആമ്പ്ലിഫയറും. പന്നിയേയും മനുഷ്യനേയും ബാ‍ധിക്കുന്ന രണ്ടു തരം ഫ്ലൂകളും പരസ്പരം കലരാനിടയാക്കുന്ന് ഇത്തരം സാഹചര്യങ്ങളാണ് ശ്രദ്ധാപൂര്‍വ്വം വീക്ഷിക്കേണ്ടത്. ഈ രോഗങ്ങളൊന്നും തന്നെ നല്ലവണ്ണം പാചകം ചെയ്ത പന്നിമാംസത്തിലൂടെ മനുഷ്യനിലേക്കു പകരുകയില്ലെങ്കിലും, പന്നിയും മനുഷ്യനും തമ്മിലുള്ള സഹവാസം കുറക്കുന്നതിനായി‍ ഈ ജന്തു വിഭാഗത്തെ ഭക്ഷണത്തില്‍ നിന്നും ഒഴിവാക്കിയേ മതിയാവൂ. ആയതിനാല്‍ ആലോചിക്കൂ, പന്നിയെന്ന രോഗ ദാതാവിനെ നമുക്ക് ഭക്ഷണമാക്കാതിരിക്കാം, പന്നിവളര്‍ത്തല്‍ നിരുത്സാഹപ്പെടുത്താം.


കുറിപ്പ്:
ചിത്രം 2&3 ക്ക് കടപ്പാട്: SRDDL Document on avian flue.
തികച്ചും വ്യക്തിപരമായ നിരീഷണമാണിത്, മുന്‍ കൂര്‍ ജാമ്യത്തിന് അപേക്ഷ നല്‍കിയിട്ടുണ്ട്.

4/27/2009

കൃഷിയെന്ന മരുന്ന്

മനുഷ്യസമൂഹത്തോളം തന്നെ ചരിത്രം അവകാശപ്പെടാവുന്ന ഒരു ചര്യയാണ് കൃഷി. നമ്മുടെ നിലനില്‍പ്പിന്റെ അടിസ്ഥാന ഘടകമായിവര്‍ത്തിക്കുന്ന ഒന്നാണ് ഭക്ഷണം എന്നതിനാല്‍തന്നെ, കാര്‍ഷിക വൃത്തിയെ മാറ്റി നിര്‍ത്തി മനുഷ്യനു ജീവിതവുമില്ല. കേരളീയ സമൂഹത്തിലും ഒരു തലമുറ മുമ്പ് വരെ കാര്‍ഷിക വൃത്തിയെ ആശ്രയിച്ചാണ് സാമ്പത്തിക രംഗം പിടിച്ചു നിന്നിരുന്നതെന്ന സത്യം മുന്നില്‍ നില്‍ക്കുമ്പോഴും, കൃഷി എന്നാല്‍ ആത്മഹത്യ എന്ന പദമാണ് നമുക്ക് മുന്നിലിന്ന് തെളിയുന്നത്. അതിന്റെ വിശദാശങ്ങളിലേക്ക് കടക്കുന്നില്ല, ഒരു ആമുഖമായി ഈ വരികള്‍ കുറിച്ചു എന്നേ ഉള്ളൂ.

ഹോര്‍ട്ടിക്കള്‍ച്ചര്‍ തെറാപ്പി എന്ന സങ്കല്‍പ്പത്തെപ്പറ്റി കേള്‍ക്കാത്തവര്‍ വിരളമായിരിക്കും എന്ന് കരുതുന്നു. ഹോര്‍ട്ടിക്കള്‍ച്ചര്‍ തെറാപ്പി എന്നാല്‍, വ്യക്തികളിലെ രോഗാവസ്ഥയെ അഭിസംബോധന ചെയ്യാനായി കാര്‍ഷിക വൃത്തിയെ ഉപയോഗപ്പെടുത്തുന്ന രീതിയാണ്. വാര്‍ദ്ധക്യത്തിന്റെ വിഷമതകള്‍ മുതല്‍ മനോരോഗികളിലെ വിഭ്രമങ്ങള്‍ വരെ വലിയൊരളവില്‍ ഇവിടെ കൈകാര്യം ചെയ്യപ്പെടുന്നു. ഹോര്‍ട്ടിക്കള്‍ച്ചര്‍ എന്നത് ഒരു പുതിയ സങ്കേതമല്ലെങ്കിലും, ഒരു ചികിത്സാ വിധിയെന്ന രീതിയില്‍ ഇതിനെ ഉപയോഗപ്പെടുത്താ‍നാരംഭിച്ചിട്ട് നാളുകളേറെയായിട്ടില്ല. ആരംഭിച്ചിന്നോളം പുറത്തുവന്ന ഫലങ്ങള്‍ ആശാവവങ്ങളാണ്. ശാരീരികവും മാനസ്സികവുമായ അവസ്ഥകളില്‍ ഗുണപരമായ മാറ്റങ്ങളുണ്ടക്കാനീ രീതിക്കായി. പ്രധാനമായും മാനസികമായ ആരോഗ്യ പുഷ്ടീകരണത്തിനാണ് ഇന്നിത് പരീക്ഷിച്ചു വരുന്നത്. വിവിധ മാനസികാരോഗ്യ കേന്ദ്രങ്ങളില്‍ നടന്ന പഠനങ്ങളില്‍ , രോഗികളുടെ മാനസികമായ ശക്തി വര്‍ദ്ധിപ്പിക്കുന്നതിലും , അവരില്‍ ആത്മവിശ്വാസം വളര്‍ത്താനും , കൃയാത്മക പ്രവര്‍ത്തിയുടെ സന്തുഷ്ടി അനുഭവിക്ക വഴി ആത്മ ബോധം വളര്‍ത്താനും ഈ തെറാപ്പി ഉപകരിച്ചു എന്ന റിപ്പോര്‍ട്ട് ചെയ്യപ്പെട്ടിട്ടുണ്ട്. ചെറു തോട്ട നിര്‍മ്മാണം, സസ്യ പരിപാലനം, നിരീക്ഷണങ്ങള്‍, കായ് ഫലം ഇറുക്കല്‍ തുടങ്ങിയ പ്രവര്‍ത്തികള്‍ ആര്‍ക്കാണ് സന്തോഷമേകാത്തത്. ഇതേപ്പറ്റി പ്രതിപാദിക്കുന്ന നിരവധി സൈറ്റുകള്‍ ലഭ്യമാണ്, ഉദാഹരണമായി അമേരിക്കന്‍ ഹോര്‍ട്ടിക്കള്‍ച്ചര്‍ സൊസൈറ്റി അസ്സോസിയേഷന്‍.
തൃശ്ശൂര്‍ മാനസ്സികാരോഗ്യ കേന്ദ്രത്തില്‍ നടന്ന ഒരു പഠനം കണ്ടിരുന്നു, ലിങ്ക് ഇല്ല. കേരള സര്‍ക്കാറിന്റെ കാര്‍ഷിക വികസന പരിപാടികളിലും ഈ സങ്കേതം പരാമര്‍ശിക്കുന്നു എന്നത് ഗുണപരമായ ഒരു മാറ്റമായി കണക്കാക്കാവുന്നതാണ്.

നമ്മുടെ മുന്‍ തലമുറ അനുഭവിച്ചു വന്നിരുന്ന മനോശാന്തിക്കും മാനസികാരോഗ്യത്തിനും സൌമ്യ ശീലത്തിനും ഇതിലും നല്ലോരു തെളിവു വേറെ ആവശ്യമുണ്ടോ? കാര്‍ഷിക വൃത്തിയില്‍ നിന്നും പുറം തിരിഞ്ഞു നില്‍ക്കുന്ന പുതു തലമുറ ആന്തരികവും ബാഹ്യവുമായ സമ്മര്‍ദ്ദങ്ങളില്‍ ഉഴറുമ്പൊള്‍, ആശ്വാസം നല്‍കാന്‍ ഓണ്‍ലൈന്‍‍ ഗെയിമുകളായെങ്കിലും കൃഷി പുനരവതരിക്കുന്നത് ആശാവഹമാണ്, ഫേസ് ബുക്കിന്റെ ഫാം ടൌണ്‍ ഉദാഹരണം.

4/13/2009

ഇസ്രായേലും കന്നുകാലി വികസനവും


ഇസ്രായേല്‍ എന്ന രാജ്യത്തിന്റെ പേര് ലോകത്തെമ്പാടുമിന്ന് പടരുന്നത് അല്പം കുപ്രസിദ്ധിയോടെയാണെന്ന് പറഞ്ഞാല്‍ അത് അതിശയോക്തിയാവില്ല. ഇന്ത്യയുടെ‍ പ്രത്യേകിച്ച് കേരളം ബംഗാള്‍ എന്നീ സംസ്ഥാന സര്‍ക്കാരുകളുടെ ഇസ്രായേല്‍ ബന്ധങ്ങള്‍ തിരഞ്ഞ് ബൂലോകരും അല്ലാത്തവരും സേര്‍ച്ചെഞ്ചിനുകള്‍ കയറിയിറങ്ങുന്നു. കോടിക്കണക്കിനു രൂപ വിലമതിക്കുന്ന ഇസ്രായേല്‍ കാളകളെ ഇറക്കുമതി ചെയ്യാന്‍ കേരള സര്‍ക്കാര്‍ കേന്ദ്രത്തിന്റെ അനുമതിക്കായി കാത്തുകിടക്കുന്നതായി റിപ്പോര്‍ട്ടുകള്‍ പുറത്തുവരുന്നു. അതിന്റെ രാഷ്ട്രീയം തല്‍ക്കാലം മാറ്റി നിര്‍ത്തിയാല്‍ , കേരളത്തിലെ കന്നുകാലി വികസനവുമായി ഇസ്രായേലിനെ കൂട്ടിയിണക്കുന്നതെന്ത് എന്ന് വസ്തുനിഷ്ഠമായി വിലയിരുത്താനാവും.

പരമ്പരാഗത കൃഷി രീതികള്‍ സ്വന്തമായില്ലാത്ത ഒരു രാജ്യമാണ് ഇസ്രായേല്‍ എന്നു പറയാം. രാജ്യതാത്പര്യ സംരക്ഷണാര്‍ത്ഥം ആധുനിക രീതിയില്‍ സ്വയം വികസിപ്പെടുത്തതെന്ന് പറയാവുന്ന, പരമാവധി ക്ഷമത നല്‍കുന്ന വ്യവസായങ്ങളാണ് കൃഷിയും മൃഗസംരക്ഷണവും. രാജ്യത്തെ താരതമ്യേന മോശമായ കാലാവസ്ഥയും, മേച്ചില്‍പ്പുറങ്ങളുടെ അഭാവവും മൃഗസംരക്ഷണ വ്യവസായത്തിന് കനത്ത വെല്ലുവിളിയായിരുന്നു എന്ന് വിലയിരുത്തുന്നതില്‍ തെറ്റില്ല. ഈ വ്യവസായങ്ങളുടെ ഏറ്റവും അടിസ്ഥാന ഘടകങ്ങളാണ് ഇവ രണ്ടും എന്ന് പ്രത്യേകം പറയേണ്ടതില്ലല്ലോ. എന്നിരുന്നാലും ഇസ്രായെലിന്റെ ഔദ്യോഗികമായി ലഭ്യമാകുന്ന കണക്കുകള്‍ (2006 വര്‍ഷം) പരിശോധിക്കുക.

ആകെ ജനസംഖ്യ : 70, 00, 000
പശുക്കളുടെ എണ്ണം : 1, 10, 000
മൊത്തം പാലുത്പാദനം :11,50,000 മെട്രിക് ടണ്‍
ഒരു പശുവിന്റെ ശരാശരി ഉത്പാദനം : 11281 കി.ഗ്രാം (പ്രതിദിനം 40 ലിറ്റര്‍)

ഹോള്‍സ്റ്റീന്‍ ഫ്രീഷന്‍ ഇനത്തില്‍ പെട്ട യൂറൊപ്യനായ ‍ പശുവാണിവിടെ കൂടുതല്‍ വളര്‍ത്തപ്പെടുന്നത്. താരതമ്യേന തണുപ്പുള്ള അന്തരീക്ഷത്തില്‍ വളരുന്ന ഈ പശുക്കള്‍ ഇസ്രായേലിലെ കഠിന കാലാവസ്ഥയി എപ്രകാരമാണ് ഉയര്‍ന്ന പാലുത്പാദനം നല്‍കുന്നതെന്ന് പരിശോധിച്ചാല്‍ കാണാവുന്നത് ജനിതക ശാസ്ത്രത്തിന്റെ “സെലക്ഷന്‍” എന്ന സാങ്കേതികതയാണ്. മോശമായ അന്തരീക്ഷത്തില്‍ വളര്‍ത്താനാരംഭിച്ച പശുക്കളുടെ, കാലാവസ്ഥയുമായി താദാത്മ്യം പ്രാപിക്കാനുള്ള കഴിവ് വളര്‍ത്തിയെടുത്താണിത് സാദ്ധ്യമാക്കിയത്. ഏറ്റവും മോശപ്പെട്ട കാലാവസ്ഥ, പരിചരണ രീതികള്‍ എന്നിവയെ അതിജീവിക്കുന്നവയെ മാത്രം അടുത്ത തലമുറക്കായി തിരഞ്ഞെടുക്കുകയും മറ്റുള്ളവയെ ഒഴിവാക്കുകയുമാണീ വിദ്യയില്‍ ചെയ്യുന്നത്. തിരഞ്ഞെടുക്കപ്പെട്ടവയെ വീണ്ടും ഇത്തരത്തില്‍ സെലക്ഷന് വിധേയമാക്കി, ചൂട്, ഹുമിഡിറ്റി, കെട്ടിയിട്ട് തീറ്റല്‍ തുടങ്ങിയ പരിചരണഘടകങ്ങള്‍ അടിസ്ഥാനപ്പെടുത്തി നടത്തിയ ഗവേഷണ ഫലങ്ങളാണ് മേല്‍ കുറിച്ചിട്ട പാലുത്പാദനം സാദ്ധ്യമാക്കിയത്. പരമ്പരാഗത കാലിവളര്‍ത്തല്‍ ഇല്ലാതിരുന്നത് സഹകരണ മേഖല പുഷ്ടിപ്പെടാനും ശാസ്ത്രീയ പരിചരണമുറകളും , അതിലുപരി രേഖകള്‍ സൂക്ഷിക്കുന്ന സ്വഭാവം (റെക്കോഡ് കീപ്പിംഗ്) വളര്‍ത്തിയെടുക്കുന്നതിനും സഹായകമായി.

കേരളത്തിലേക്കു വരാം.
മാട്ടുപ്പെട്ടിയില്‍ സ്ഥാപിക്കപ്പെട്ട ഇന്‍ഡോ സ്വിസ്സ് പ്രോജക്റ്റാണ് വിദേശ ജനുസില്‍ പെട്ട വിത്തുകാളകളെ ആദ്യമായി ഇന്ത്യയിലെത്തിക്കുന്നതും, കൃതൃമ ബീജ സങ്കലത്തിന് അടിത്തറ പാകിയതും. സ്വിറ്റ്സര്‍ലാന്റില്‍ നിന്നും മറ്റും നേരിട്ട് കൊണ്ടുവന്ന വിദേശ ജനുസുകള്‍ മാട്ടുപ്പെട്ടിയില്‍ നല്ല പ്രകടനം നല്‍കിയെങ്കിലും, കേരളത്തിലെ ശരാശരി അന്തരീക്ഷത്തിന്റെ ചൂടും ഹുമിഡിറ്റിയും താങ്ങാനാവാതെ പ്രതീക്ഷിച്ച പാലുത്പാദനം നല്‍കിയില്ല. അതു കൂടാതെ രോഗ പ്രതിരോധ ശേഷിയും കുറവായിരുന്നു. കേരള സര്‍ക്കാര്‍ നടത്തിയ പ്രോജനി ടെസ്റ്റിംങ് (കുട്ടികളുടെ പാലുത്പാദനവും മറ്റും കണക്കാക്കി , മാതാ പിതാക്കളുടെ ഉത്പാദനം വിലയിരുത്തുന്ന രീതി.), ഉയര്‍ന്ന നിലവാരം പുലര്‍ത്തുന്ന കുറേ വിത്തുകാളകളെ നല്‍കിയെങ്കിലും കേരളത്തിന്റെ വര്‍ദ്ധിച്ച ബീജ ആവശ്യം നിറവേറ്റാന്‍ തികയുകയുണ്ടായില്ല. റെക്കോഡുകള്‍ കൃത്യമായി ലഭ്യമല്ലാത്തത് പദ്ധതിയെ പ്രതികൂലമായി ബാധിക്കുകയും ചെയ്തു. ഈ സാഹചര്യത്തില്‍ കേരളത്തിനു ചെയ്യാവുന്നതെന്ത് എന്ന് പരിശോധിക്കുന്നതിനു മുമ്പ് നിലവിലെ സാഹചര്യങ്ങള്‍ പരിഗണിക്കേണ്ടതുണ്ട്.

കേരളത്തിലെ ഉയര്‍ന്ന അന്തരീക്ഷ താപനില.
ഉയര്‍ന്ന ഹുമിഡിറ്റി
മേച്ചില്പുറങ്ങളുടെ അഭാവം.
പ്രോജനി ടെസ്റ്റിംഗ് പോലെയുള്ള സയര്‍ ഇവാലുവേഷനുള്ള ചിലവ്.
കാലിത്തീറ്റയുടെ വര്‍ദ്ധിച്ചു വരുന്ന വില. (ഉത്പാദന ക്ഷമത ഉയര്‍ത്തേണ്ടതിലേക്ക് നയിക്കുന്നു)
പെട്ടന്ന് കൈകാര്യം ചെയ്യേണ്ടുന്ന ആവശ്യകത (ബീജത്തിന്റെ ആവശ്യം).

ഈ സാഹചര്യത്തില്‍ കേരളീയ അന്തരീക്ഷത്തോട് പരമാവധി ഇണങ്ങുകയും, പരമാവധി ബ്രീഡിംങ് വാല്യൂ തരികയും ചെയ്യുന്ന വിത്തുകാളകളെ കേരളത്തിന് ആവശ്യമായി വരുന്നു. തുടര്‍ നടപടികളില്‍ മേല്‍ പറഞ്ഞ രീതിയില്‍ വളര്‍ത്തപ്പെടുന്ന ഇസ്രായേല്‍ വിത്തുകാളകള്‍ പരിഗണിക്കപ്പെട്ടെങ്കില്‍ അത് തീര്‍ത്തും ശാസ്ത്രീയ തത്വങ്ങള്‍ക്ക് അനുസൃതം മാത്രമാണ്.

കുറിപ്പ്:
ആദ്യമായല്ല കേരളത്തിലേക്ക് വിദേശ വിത്തുകാളകളും ബീജവും കൊണ്ടു വരുന്നത്. മുമ്പും കാളകള്‍, ബീജം, ഭ്രൂണം, കൂടാതെ ബോയര്‍ ആടൂകള്‍ എന്നിവ ഇറക്കുമതി ചെയ്തിട്ടുണ്ട്. ഇപ്പോള്‍ പദ്ധതിയിട്ടിട്ടുള്ള വിത്തുകാളവാങ്ങലില്‍ ഒരെണ്ണത്തിന് 2 ലക്ഷം രൂപ നിരക്കില്‍ 20 എണ്ണമാണ് വാങ്ങാനുദ്ദേശിക്കുന്നത്. മാട്ടുപ്പെട്ടിയില്‍ ഒരു പ്രൂവണ്‍ വിത്തുകാളക്ക് 5 ലക്ഷത്തോളം ചിലവ് വരും എന്നത് ഇതിനോട് കൂട്ടി വായിക്കേണ്ടതാണ്.

വിവരങ്ങള്‍ക്കും ചിത്രങ്ങള്‍ക്കും കടപ്പാട്: ഇസ്രായേല്‍ കാറ്റില്‍ ബ്രീഡേഴ്സ് അസോസിയേഷന്റെ 2006 ലെ റിപ്പോര്‍ട്ട്

3/04/2009

മനേകാ ഗാന്ധിയും മുയലുകളും

മാതൃഭൂമി വാരാന്ത്യപ്പതിപ്പിലെ സ്ഥിരം പംക്തികളിലൊന്നാണ് ശ്രീമതി. മനേകാ ഗാന്ധിയുടെ "അരുമ". മൃഗങ്ങള്‍ക്ക് നേരെ നടക്കുന്ന ക്രൂരതകള്‍ പൊടിപ്പും തൊങ്ങലും ചേര്‍ത്ത് വിവരിക്കുന്ന ഈ പംക്തി, പലപ്പോഴും അബദ്ധജഠിലങ്ങളായ പ്രസ്താവനകള്‍ നിറഞ്ഞതായിരിക്കുമെന്ന് പറയുന്നതിന് മടി തോന്നുന്നില്ല. ഭാരത്തിലെ ജന്തുസ്നേഹത്തിന്റെ പര്യായമാണ് മനേക ഗാന്ധി എന്ന വ്യക്തി. എന്നാല്‍ പലകുറിപ്പുകളും ഈ ഗൌരവം തിരസ്കരിക്കുന്നു എന്നു പറയാതെ വയ്യ. ജനങ്ങളില്‍, പ്രത്യേകിച്ചും മൃഗസ്നേഹം മനസ്സില്‍ സൂക്ഷിക്കുന്നവരും എന്നാല്‍ മൃഗങ്ങളുമായി നേരിട്ട് ബന്ധമില്ലാത്തവരുമായ അനേകരില്‍ തെറ്റിദ്ധാരണയും ഭീതിയും പടര്‍ത്തുവാനാണ് ഇത്തരം കുറിപ്പുകള്‍ ഏറെ ഉതകുന്നത്.
ഇക്കഴിഞ്ഞ മാര്‍ച്ച് ഒന്ന് ഞായറാഴ്ച മാതൃഭൂമിയില്‍ വന്ന, "ക്രൂരത മുയലിനോടും" എന്ന കുറിപ്പ് ഇതില്‍ അവസാനത്തേതാണ്. ചിത്രത്തില്‍ ക്ലിക്കിയാല്‍ വലുതായി കാണാം.


"മുയല്‍ വളര്‍ത്തല്‍ പഠിക്കാന്‍ ഉദ്യോഗസ്ഥര്‍ വിദേശ യാ‍ത്ര നടത്തി , ഷോപ്പിങ് മാളുകളും നിശാക്ലബ്ബുകളും സന്ദര്‍ശിച്ചു മടങ്ങി" എന്ന ആദ്യ വരി തന്നെ ലേഖനത്തിന്റെ നിലവാരം വെളിവാക്കുന്നു. രണ്ടാം ഖണ്ഡികയിലെ "വിവരമില്ലാത്ത രാഷ്ടീയക്കാരും, മണ്ടന്മാരായ കൃഷി വകുപ്പ് ഉദ്യോഗസ്ഥരും" എന്ന വിശേഷണങ്ങളാവട്ടെ ചില്ല്ലിട്ടു സൂക്ഷിക്കേണ്ടതാണ്. ലോകസഭാ തിരഞ്ഞെടുപ്പ് രാഷ്ടീയവുമായി പണ്ടുണ്ടായ ബന്ധത്തില്‍ നിന്നും ഉരുത്തിരിഞ്ഞ സ്വയം വിലയിരുത്തലായി ആദ്യ ഭാഗത്തെ കാണാമെങ്കിലും രണ്ടാമത്തെ ഭാ‍ഗം ഏതു ഗവേഷണ ഫലമാണെന്ന് വ്യക്തമാക്കെണ്ടതായിരുന്നു.

കേവലം ഒന്നോ രണ്ടോ ഉദാഹരണങ്ങള്‍ ചൂണ്ടിക്കാട്ടി മുയല്‍ വളര്‍ത്തല്‍ എന്ന പദ്ധതി തന്നെ ക്രൂരതയാണെന്നും, പരാജയമാണെന്നും സമര്‍ത്ഥിക്കാന്‍ ശ്രമിക്കുകയാണ് ലേഖിക. വിദേശ ജനുസുകളെ ഇറക്കുമതി ചെയ്തതാണ് സര്‍വ്വ പ്രശ്നങ്ങള്‍ക്കും കാരണം എന്നു പറഞ്ഞുവക്കുന്ന ഇവര്‍ , നൂറു ശതമാനവും വിദേശിയായ ബ്രോയിലര്‍ കോഴി വ്യവസായത്തിന്റെ വിജയം കണ്ടില്ലെന്നു നടിക്കുകയാണ്. ഇതിന് ആധാരമാക്കുന്നതാവട്ടെ പേരെടുത്ത് പറയാത്ത ഏതോ ഒരു വെബ് സൈറ്റും. ശാസ്ത്രവുമായി പുലബന്ധം പോലുമില്ലാത്ത പലകാര്യങ്ങളും വിവരിക്കുന്ന ഇത്തരം വെബ് സൈറ്റുകള്‍ ആധാരമാക്കുന്നതാവാം ശ്രീമതി. മനേകാ ഗാന്ധിക്കു പറ്റുന്ന തെറ്റെന്ന് സമാശ്വസിക്കാം.

താന്‍ സന്ദര്‍ശിച്ചു എന്നു പറയപ്പെടുന്ന ചില ഫാമുകളിലെ സ്ഥിതി വിവരക്കണക്കുകള്‍ എത്രമാത്രം വിശ്വാസ യോഗ്യമാണെന്ന് പരിശോധിക്കതന്നെ വേണ്ടി വരും. മുയലുകളിലെ മരണനിരക്ക്, പെണ്‍ മുയലുകളിലെ ക്രമാതീതമായ മരണ നിരക്ക് , മുയല്‍ കുഞ്ഞുങ്ങളുടെ മരണ നിരക്ക് തുടങ്ങിയവയൊന്നും തന്നെ യാഥാര്‍ത്ഥ്യത്തൊട് ചേര്‍ന്നു നില്‍ക്കുന്നില്ല. കേരള‍ത്തിലെ സാഹചര്യങ്ങളില്‍ പോലും നടത്താവുന്നതും നടത്തി വരുന്നതുമായ മുയല്‍ വളര്‍ത്തല്‍, താരതമ്യേന “വളര്‍ത്തു ചിലവ്“ കുറവായ ഉത്തരേന്ത്യയില്‍ എന്തു കൊണ്ട് പരാജയമാവുന്നു (അങ്ങിനെ ആണ് യാഥാര്‍ത്ഥ്യമെങ്കില്‍) ഗൌരവമായി പരിശോധിക്കേണ്ടതുണ്ട്.

ഏതൊരു പുതിയ സംരഭങ്ങള്‍ ആരംഭിക്കുമ്പോളും കണക്കിലെടുക്കേണ്ടുന്ന ചില സംഗതികള്‍ മുയല്‍ വളര്‍ത്തലിലും ബാധകമാണെന്ന് വിസ്മരിക്കുന്നില്ല. ഇവയില്‍ ചിലതാണ് അസംസ്കൃത വസ്തുക്കളുടെ ലഭ്യത, വിപണി, ആവശ്യമായ ബോധവല്‍ക്കരണം. ഇവയില്ലാത്ത എല്ലാ സംരഭങ്ങളും പരാജയപ്പെടുക തന്നെ ചെയ്യും.

ഏതായാലും മേലിലെങ്കിലും കൂടുതല്‍ ഗൌരവമാ‍യ ഒരു സമീപനം മനേകാ ഗാന്ധിയെന്ന മൃഗസ്നേഹിയുടെ ഭാഗത്തു നിന്നും ഉണ്ടാവും എന്ന പ്രതീക്ഷയില്‍, ഈ കഴിഞ്ഞ മാസം പുറത്തിറങ്ങിയ സര്‍ക്കാര്‍ പ്രസിദ്ധീകരണമായ കേരള കര്‍ഷകനിലെ ഒരു ലേഖനം സ്കാന്‍ ചെയ്തു ചേര്‍ക്കുന്നു, ക്ലിക്കി വലുതാക്കി വായിക്കുമല്ലോ.


2/04/2009

മനുഷ്യനും പന്നിയും

മനുഷ്യനിലേക്കു പകരാവുന്ന ജന്തു ജന്യ രോഗങ്ങളില്‍ ഒരു ചെറു ശതമാനം സംഭാവന നല്‍കുന്ന ഒരു വളര്‍ത്തുമൃഗമാണ് പന്നി. മനുഷ്യനെ ബാധിക്കുന്ന പല രോഗങ്ങളും പന്നിയിലും, അഥവാ തിരിച്ചും, രോഗം സൃഷ്ടിക്കാന്‍ ശേഷിയുള്ളവയാണെന്ന് കണ്ടെത്തിയിട്ടുണ്ട്. ഈ സാഹചര്യത്തില്‍ മനുഷ്യനും പന്നിയും തമ്മിലെന്ത് എന്നൊരു ചിന്ത.

പന്നിയിയും മനുഷ്യനും ചില പൊതു ജൈവ സ്വഭാവങ്ങള്‍ കാണാനാവുമെന്ന് ശാസ്ത്രം പറയുന്നു. പല പഠനങ്ങളും വീക്ഷിക്കാനാവുമെങ്കിലും പ്രധാനമായ രണ്ടു വസ്തുതകള്‍ സൂചിപ്പിക്കുന്നു.

ഈ രണ്ട് വിഭാഗത്തിന്റേയും ഇന്‍സുലിന്‍ ഘടനാപരമായ ചില വ്യത്യാസങ്ങള്‍ ഉണ്ട് എങ്കിലും പന്നി ഇന്‍സുലിന്‍ മനുഷ്യനില്‍ പ്രവര്‍ത്തിക്കുന്നതായി കണ്ടെത്തിയിട്ടുണ്ട്.
പന്നിയില്‍ നിന്നും എടുത്ത് മനുഷ്യനില്‍ സ്ഥാപിച്ച ഇന്‍സുലിന്‍ ഉത്പാദന കോശങ്ങള്‍ വിജയകരമായി ഇന്‍സുലിന്‍ ഉദ്പാദിപ്പിച്ചതായി പഠനങ്ങള്‍ സാക്ഷ്യപ്പെടുത്തുന്നുണ്ട്.

അവയവ മാറ്റ ശസ്ത്രകൃയയിലെ മുഖ്യ വെല്ലുവിളികളിലൊന്നാണ് കോശ/ അവയവ തിരസ്കരണം. എന്നാല്‍ പന്നിയില്‍ നിന്നും മനുഷ്യനിലേക്ക് മാറ്റി വച്ച ശരീരഭാ‍ഗങ്ങളെ വിജയകരമായി മനുഷ്യ ശരീരം സ്വീകരിക്കാറുണ്ട്. കരള്‍, ഹൃദയ വാല്വുകള്‍ തുടങ്ങിയവ ഇപ്രകാരം പരീഷിക്കപ്പെട്ട അവയവങ്ങളാണ്. ഇതു സൂചിപ്പിക്കുന്നത് ഇവയുടെ രണ്ടിന്റേയും ശരീരത്തിന്റെ ഇമ്മ്യൂണ്‍ പ്രതികരണങ്ങളുടെ സാമ്യതയാണ്.

ഇപ്രകാരം മനുഷ്യശരീരകോശങ്ങളുമായുള്ള സാമ്യതകള്‍ ചില രോഗങ്ങളുടെ കാര്യത്തിലെങ്കിലും അപകടകരമായ അവസ്ഥ സൃഷ്ടിക്കുന്നു എന്നു വിലയിരുത്തപ്പെടുന്നു. നാടവിരകളുടെ ലാര്‍വകളും മറ്റും പഴങ്കഥകളാണെങ്കില്‍ ഇബോള വൈറസ് രോഗം പന്നിയില്‍ നിന്നും മനുഷ്യനില്‍ പകര്‍ന്നതായി പുതിയ വാര്‍ത്തകള്‍ പറയുന്നു. ഈ വിഭാ‍ഗത്തില്‍ ലോകാരോഗ്യ സംഘടന ചൂണ്ടിക്കാട്ടുന്ന മറ്റൊരു ഭീഷണിയാണ് മനുഷ്യനില്‍ പകരാവുന്ന പക്ഷിപ്പനി. മനുഷ്യനെ ബാധിക്കുന്ന ഇന്‍ഫ്ലുവെന്‍സ വൈറസ്, പക്ഷിപ്പനി വൈറസിനേപ്പോലെ പന്നിയില്‍ രോഗം സൃഷ്ടിക്കാന്‍ കഴിവുള്ളതാണ്. ഒരേസമയം മനുഷ്യ ഇന്‍ഫ്ലുവെന്‍സയും പക്ഷി ഇന്‍ഫ്ലുവെന്‍സയും ഒന്നിച്ച് ഒരു പന്നിയുടെ ശരീരത്തില്‍ കടന്നു കൂടിയാല്‍, ഇവ യോജിച്ച് മനുഷ്യനില്‍ നിന്നും മനുഷ്യനിലേക്ക് പകരാന്‍ കഴിവുള്ള പക്ഷിപ്പനി വൈറസ് ജന്മമെടുക്കാനുള്ള സാദ്ധ്യതയാണ്, മറ്റൊരു മഹാമരിയുടെ സൂചനയായി പക്ഷിപ്പനിയെ മാറ്റുന്നത്. ശ്വാസകോശവും അനുബന്ധ അവയവങ്ങളിലും മാത്രം നാശം വിതക്കാന്‍ കഴിവുള്ള മനുഷ്യ ഇന്‍ഫ്ലുവെന്‍സ എല്ലാ ശരീര കലകളെയും ബാധിക്കാന്‍ ശേഷിയുള്ള വൈറസാവാന്‍ പന്നി സഹായിച്ചേക്കാം. ഇത് രണ്ടു വൈറസുകളുടേയും ഒരു മിക്സിംഗ് പാത്രമായി പ്രവര്‍ത്തിക്കാം.

പന്നിയുടെ ശരീര കോശങ്ങളില്‍ കടന്നു പുറത്തു വരുന്ന ചില വൈറസുകളുടെ ശക്തി വര്‍ദ്ധിക്കുന്നതായി കണ്ടിട്ടുണ്ട്. ഉദാഹരണമായി കന്നുകാലികളിലെ കുളമ്പുരോഗം. പന്നിയിലൂടെ കടന്നു പോകുന്ന കുളമ്പുരോഗ വൈറസ് പതിന്മടങ്ങ ശക്തിയാര്‍ജ്ജിക്കുന്നു. ഇവിടെ ഒരു ജൈവ ആമ്പ്ലിഫയറായി പന്നി പ്രവര്‍ത്തിക്കുന്നു.

പന്നിയെ കൈകാര്യം ചെയ്യുന്നതില്‍ കൂടുതല്‍ ശ്രദ്ധയും ജാഗ്രതയും വേണം എന്നാണ് ഈ വസ്തുതകള്‍ സൂചിപ്പിക്കുന്നത്. "അപ്പിതിന്നുന്ന ജീവി" എന്ന നിലയിലാണെങ്കില്‍ പോലും നമ്മുടെ മുന്‍ഗാമികളില്‍ ചിലര്‍ പന്നിയെ അകറ്റി നിര്‍ത്താന്‍ പണ്ടേ ഉപദേശിച്ചിരുന്നു എന്നത് കാണാതിരുന്നുകൂട.

1/22/2009

പക്ഷിപ്പനിയെന്ന വ്യവസായം

ഇന്നു രാവിലെ മാതൃഭൂമിയില്‍ കണ്ട വാര്‍ത്താ ശകലമാണിത്.

ലോകം ഇന്ന് പക്ഷിപ്പനിയെന്നൊരു മഹാമാരി ഭീഷണിയെ നേരിട്ടുകൊണ്ടിരിക്കുകയാണെന്ന് ലോകാരോഗ്യ സംഘടന വിലയിരുത്തുന്നു. പക്ഷികളെ മാത്രം ബാധിച്ചിരുന്ന പക്ഷിപ്പനി വൈറസ് കഴിഞ്ഞ ഏതാനും വര്‍ഷങ്ങളായി മനുഷ്യനേയും ആക്രമിച്ചുതുടങ്ങിയതായി കണ്ടെത്തിയതിനെ തുടര്‍ന്നാണ് ഈ മുന്നറിയിപ്പ്. തുടര്‍ന്ന് ലോകവ്യാപകമായി ഇതിനെതിരെ ജാഗ്രത പുലര്‍ത്താനുള്ള നടപടികളാരംഭിക്കുകയും ഏത് അടിയന്തിര സാഹചര്യങ്ങളേയും നേരിടാന്‍ ആരോഗ്യ, മൃഗസംരക്ഷണ പ്രവര്‍ത്തകര്‍ തയ്യാറെടുക്കുകയും ചെയ്തു വരികയാണ്. ഇതിന്റെ ഭാഗമായി കേന്ദ്ര സര്‍ക്കാര്‍ നേതൃത്വത്തില്‍ സംസ്ഥാന സര്‍ക്കാര്‍ നടത്തുന്ന സ്വാഭാവിക പരിശീലന പരിപാടിയാണ് പത്ര റിപ്പോര്‍ട്ടില്‍ സൂചിപ്പിക്കുന്നത്. പക്ഷിപ്പനിയെപ്പറ്റി സൂരജിന്റെ മെഡിസിന്‍ അറ്റ് ബൂലോകത്തില്‍ വന്ന പോസ്റ്റ് ഈ വിഷയത്തിലെ ആശങ്കകള്‍ ദൂരീകരിക്കാന്‍ പര്യാപ്തമായിരുന്നു.

ഈ പരീശീലപരിപാടിയില്‍ നടന്ന് അവതരണങ്ങളിലെ രണ്ടു ചിത്രങ്ങള്‍ പ്രത്യേക ശ്രദ്ധ അര്‍ഹിക്കുന്നതായതിനാല്‍ അവ ഇവിടെ കൊടുത്തിരിക്കുന്നു.

പക്ഷിപ്പനി ബാധയെ പ്രതിരോധിക്കുന്ന ദ്രുതകര്‍മ്മ സേന (റാപ്പിഡ് റെസ്പോണ്‍സ് ടീം) അവലംബിക്കേണ്ട മുന്‍കരുതലുകള്‍ പ്രതിപാദിക്കുന്ന അവതരണത്തില്‍ നിന്നാണ് ഇത്. അണുബാധ തടയാനായി കഴിക്കേണ്ട മരുന്നാണ് ഒസള്‍ട്ടാമിവിര്‍ (ഇതിന്റെ ഉപയോഗത്തെപ്പറ്റി ഭിന്നാഭിപ്രായങ്ങള്‍ നിലവിലുണ്ട്). ടാമിഫ്ലൂ എന്ന വ്യാവസായിക ഉല്‍പ്പന്നം തന്നെ പ്രദര്‍ശിപ്പിച്ചിരിക്കുന്നത് നോക്കുക. ലോകാരോഗ്യ സംഘടനയുടെ നിര്‍ദ്ദേശപ്രകാരം ഭാരത സര്‍ക്കാര്‍ തയ്യാറാക്കിയ പരിശീലന വസ്തുക്കളാണിവയെന്ന് ഓര്‍മ്മിക്കുക.

ഒരു പക്ഷിപ്പനി ബാധിത സ്ഥലത്ത് സംഘാങ്ങള്‍ എത്തുമ്പോള്‍ ചെയ്യേണ്ട നടപടികളുടെ അവതരണത്തില്‍ നിന്നുള്ള ഒരു പ്രദര്‍ശനമാണിത്. ഇവിടെ രാസനാമം ഉപയോഗിക്കുന്നില്ല എന്നതും , പക്ഷിപ്പനി പ്രതിരോധത്തിന്റെ പര്യായമായി “ടാമിഫ്ലൂ” മാറിയതായും ശ്രദ്ധിക്കുക.

ഏതൊരു പരിശീലന പരിപാടിയിലും ഏതെങ്കിലും വ്യാവസായിക ഉല്പന്നത്തിന്റെ പ്രദര്‍ശനം ഉള്‍പ്പെടുത്തുന്നത് സംശയ ദൃഷ്ടിയോടെ മാത്രമേ വീക്ഷിക്കാനാവൂ.


ടാമിഫ്ലൂ:

അമേരിക്കയിലെ റോഷ് കമ്പനി നിര്‍മ്മിക്കുന്ന വ്യാവസായിക ഉല്‍പ്പന്നമാണിത്. പക്ഷിപ്പനിക്കെതിരെ പരമ്പരാഗത മരുന്നുകള്‍ ഫലവത്താവാതെ വന്ന സാഹചര്യത്തിലാണ് റൊഷിന്റെ ടാമിഫ്ലൂ ഉല്‍പ്പാദനം ആരംഭിക്കുന്നത്. ഒസള്‍ട്ടാമിവിര്‍ ഫോസ്പേറ്റ് ആണിതിന്റെ അടിസ്ഥാന ഘടകം. ലോകമെമ്പാടും തങ്ങളുടെ സേവനം വ്യാപിപ്പിക്കുവാന്‍ തീരുമാനിച്ചതായിയുള്ള വാര്‍ത്ത
ഇവിടെ വായിക്കാം. ജിലിയാഡ് സയന്‍സസ് എന്ന കമ്പനിയാണ് ടാമിഫ്ലൂവിന്റെ യഥാര്‍ത്ഥ പേറ്റന്റ് അവകാശികള്‍. ഈ മരുന്നുണ്ടാക്കാനുള്ള ലൈസന്‍സ് മാത്രമാണ് റൊഷ് കമ്പനിക്ക് ഇവര്‍ നല്‍കിയിട്ടുള്ളത്. ലോകമാകമാനം പക്ഷിപ്പനി ഭീഷണി പടര്‍ന്ന സാഹചര്യത്തില്‍ രണ്ടു കമ്പനികളും തമ്മില്‍ നിയമപരമായ ചില ഏറ്റുമുട്ടലുകള്‍ ഉണ്ടായെങ്കിലും തങ്ങളുടെ തര്‍ക്കങ്ങള്‍ തീര്‍ന്നു എന്ന് ഒരു പത്രക്കുറിപ്പില്‍ അറിയിച്ചിട്ടുണ്ട്. 2004 ഇല്‍ 266 ദശലക്ഷം ഡോളറായിരുന്ന ടാമൊഫ്ലൂ വിറ്റുവരവ് 2006 ഇല്‍ 925 ദശലക്ഷം ഡോളറായി ഉയര്‍ന്നു എന്ന് കണക്കുകള്‍ സൂചിപ്പിക്കുന്നു.

അമേരിക്കയിലെ ആഭ്യന്തര ഉപയോഗത്തിനും, വിവിധ രാജ്യങ്ങളിലെ അമേരിക്കന്‍ സൈനികര്‍ക്കുമായി ദശലക്ഷക്കണക്കിനു ഡോളറിന്റെ ടാമിഫ്ലൂവാണ് വാങ്ങിക്കൂട്ടിയിരിക്കുന്നതെന്നും ഇതിനു പിന്നില്‍ ബുഷ് ഭരണകൂടത്തിലെ ചില പ്രമുഖരുടെ കൈകള്‍ പ്രവര്‍ത്തിച്ചിരുന്നു എന്നും ആരോ‍പണം ഉയര്‍ന്നത് ഈ സാഹചര്യത്തിലാണ്.ജെലിയാഡ് സയന്‍സസിന്റെ തന്നെ
ഈ പത്രക്കുറിപ്പ് ഇതിനുള്ള ഉത്തരവും നമുക്ക് നല്‍കുന്നുണ്ട്. അമേരിക്കന്‍ പ്രതിരോധ സെക്രട്ടറിയായിരുന്ന സാക്ഷാല്‍ റൊണാള്‍ഡ് റംസ്ഫീല്‍ഡ് 1997 മുതല്‍ 2001 വരെ ജിലിയാഡ് കമ്പനിയുടെ ചെയര്‍മാനായിരുന്നു എന്നതാണത്. ഇതുമാത്രമല്ല ഈ കമ്പനിയില്‍ ഇദ്ദേഹത്തിനു ദശലക്ഷങ്ങള്‍ വരുന്ന ഷെയര്‍ ഉള്ളതായും ചില വാര്‍ത്തകള്‍ പറയുന്നു.

എപ്രകാരമാണ് പക്ഷിപ്പനിയും ടാമിഫ്ലൂവും ലോക വിപണി കീഴടക്കാന്‍ പോകുന്നതെന്ന ചില സൂചനകള്‍മാത്രമാണിത്.

11/26/2008

ചില ഐ-പില്‍ ചിന്തകള്‍

വീട്ടില്‍:

"അച്ഛാ,
ഇതു മനസ്സിലായില്ലാല്ലോ, എന്താ ഇത്?"

മോളുടെ ചോദ്യം കേട്ടാണ് ടീവിയിലേക്കു നോക്കിയത്.

ഒരു അമ്മ ഒരു പെണ്‍കുട്ടിയെ (മകളാണോ?) ധൈര്യം കൊടുത്ത് എങ്ങോട്ടോ കൊണ്ടു പോകയാണ്. എങ്ങോട്ടാണെന്ന് എനി‍ക്കും പെട്ടന്ന് മനസ്സിലായില്ല. എന്തായാലും സംഭവം ഐ.പില്‍ ഗുളികയുടെ പരസ്യമാണ്.

"മോളേ അതെന്തോ മിഠായി അല്ലെ?"

"അല്ലച്ഛാ, അത് എന്തോ മരുന്നാണ്, മരുന്നു കഴിക്കാന്‍ എന്തിനാണ് പേടിക്കുന്നത്"

എനിക്കു മറുപടിയില്ല.

എന്തു മറുപടി നല്‍കും എന്നതതിനേക്കാള്‍ ഐ.പില്‍ എന്ന ഹൊര്‍മോണ്‍ കൈകര്യം ചെയ്യുന്ന ലാഘവബുദ്ധിയാണ് എന്നെ അമ്പരപ്പിച്ചത്.

ഈ വിഷയം അങ്കിളിന്റെ പോസ്റ്റില്‍ മുന്‍പ് വന്നിരുന്നെങ്കിലും, വീട്ടില്‍ ഈ ചോദ്യം അഭിമുഖീകരിക്കേണ്ടി വന്നത് എന്നെ കൂടുതല്‍ ചിന്തിപ്പിച്ചു.

സിപ്ല കമ്പനി മാര്‍ക്കറ്റിലിറക്കിയ ഐ - പില്‍ എന്ന മാജിക് മരുന്ന്, ഇന്ന് നമുക്ക് സുപരിചിതമാണ്. ഇന്ത്യന്‍ യുവാക്കളെ ടീവിക്കു മുന്നില്‍ അടയിരുത്തിയ 20 20 മത്സരങ്ങള്‍ക്കിടയില്‍ നിറഞ്ഞു നിന്ന ഈ ഗുളിക, അവരുടെ മനസിലേക്കും , അവിടെ നിന്നും അവരുടെ പോക്കറ്റിലേക്കും കടന്നു വന്നിരിക്കാം. ഇത്തരം പരസ്യങ്ങളുടെ ധാര്‍മികത ചോദ്യം ചെയ്യാന്‍ നമുക്ക് അവകാശമില്ല. അപ്രകാരം ചെയ്താല്‍ കപടസദാചാരക്കാരനായി മുദ്രകുത്തപ്പെടും.

ഗുളിക കഴിക്കൂ, ധൈര്യമായി ലൈംഗിക ബന്ധത്തില്‍ ഏര്‍പ്പെടൂ, എന്നാണ് കമ്പനി പരസ്യം ചെയ്യുന്നത്. ലഭ്യമായ ആരുമായും ആവാം എന്ന് ധ്വനി ഉണ്ടോ എന്ന് ദോഷൈക ദൃക്കുകളുടെ സംശയം മാത്രം.

ലീവോനോര്‍ജെസ്റ്റ്രെല്ല് എന്ന ഐ-പില്‍, പ്രൊജസ്റ്റ്രോണ്‍ സ്ത്രൈണഹോര്‍മോണ്‍ വിഭാഗത്തില്‍ പെടുന്ന ഒന്നാണ്. ലൈഗിക ബന്ധം നടന്ന് 72 മണിക്കൂറിനുള്ളില്‍ ഇതു കഴിച്ചാല്‍ ഗര്‍ഭധാരണം നടക്കുകയില്ല എന്നതാണ് ഇതിന്റെ ജൈവ ഫലം.
അണ്ഡവിസര്‍ജ്ജനം തടയുക, ഗര്‍ഭാശയമുഖത്തെ ദ്രവത്തിന്റെ കനം വര്‍ദ്ധിപ്പിക്കുകയും അതുവഴി ബീജത്തിന്റെ മുന്നോട്ടു പോക്ക് തടയുക, എന്നിവയാണ് ഇതിന്റെ മുഖ്യ ധര്‍മ്മങ്ങള്‍. 72 മണിക്കൂര്‍ വരെ എന്നു പറയുന്നുണ്ടെങ്കിലും 12 മണിക്കൂറിനുള്ളില്‍ തന്നെ കഴിക്കുകയാണ് ഉത്തമം എന്നാണ് നിരീക്ഷണങ്ങള്‍ സൂചിപ്പിക്കുന്നത്.

ഐ - പില്‍ ഇന്ത്യയില്‍:

ഐ-പില്‍ ഒരു ഗര്‍ഭഛിദ്രമരുന്ന് അല്ല എന്നാണ് കമ്പനി അവകാശപ്പെടുന്നത്. ഒരു അണ്ഡം ബീജവുമായി സംയോജിച്ച്, ഗര്‍ഭാശയത്തില്‍ സ്ഥാനം പിടിച്ചാല്‍ മാത്രമേ ഗര്‍ഭം എന്ന അവസ്ഥ സംജാതമാകുന്നുള്ളൂ എന്നും, അതിനാല്‍ ബീജ സങ്കലനം തടയുന്ന ഈ മരുന്നു ഗര്‍ഭച്ഛിദ്രമല്ല നടത്തുന്നത് എന്നുമുള്ള വാദം സാങ്കേതികമായി അംഗീകരിക്കപ്പെട്ടതിന്റെ ഫലമാണ് ഈ പരസ്യം. ആദ്യ ഘട്ടത്തിലെ ഗര്‍ഭഛിദ്രം അത്ര മാരകമല്ലെങ്കിലും ഇന്ത്ര്യയില്‍ പ്രതിവര്‍ഷം നടക്കുന്ന 11 മില്ല്യണ് ഗര്‍ഭഛിദ്രങ്ങളില്‍ 20000 സ്ത്രീകള്‍ ഇതുമൂലം മരിക്കുന്നതായി എ.ഐ.ഐ.എം.എസ്സിലെ ഒരു .പ്രസിദ്ധീകരണം പറയുന്നു. ഇതിനാല്‍ അരോഗ്യകരമായ ഗര്‍ഭനിരോധനം പ്രോത്സാഹിപ്പിക്കുക എന്ന കമ്പനിയുടെ ലക്ഷ്യം തള്ളിക്കളയാനാവുമോ?

പാര്‍ശ്വഫലങ്ങള്‍:

പ്രോജസ്റ്റ്രോണ്‍ ഒരു ഹോര്‍മോണ്‍ ആണെന്നുള്ളത് തന്നെ ഇതിന്റെ ഗൌരവം വര്‍ദ്ധിപ്പിക്കുന്നു. ഹോര്‍മോണ്‍ മരുന്നുകള്‍ പരമാവധി ഒഴിവാക്കണം എന്ന അഭിപ്രായക്കാരനാണ് ഞാന്‍.

20 ശതമാനം ആളുകളില്‍ മനമ്പുരട്ടല്‍, ശര്‍ദ്ദി എന്നിവയും അടിവയര്‍ വേദനയും ഉണ്ടാവുന്നതായി പഠനങ്ങള്‍ സൂചിപ്പിക്കുന്നു.
ചെറിയൊരു ശതമാനം ആളുകളില്‍ വയറിളക്കം ഉണ്ടാവുന്നു.
ശര്‍ദ്ദി, വയറിളക്കം എന്നിവ മരുന്നിന്റെ ഫലത്തെ തന്നെ ബാ‍ധിക്കും എന്നു പ്രത്യേകം പറയേണ്ടതില്ലല്ലോ.

ഈ രാസവസ്തുവിനു സെന്‍സിറ്റിവിറ്റി ഉള്ള ആളുകള്‍ ഉണ്ടാവാം, അത്തരം സന്ദര്‍ഭങ്ങളില്‍ വിദ്ധചികിത്സ ആവശ്യമായി വരും.

അമിത രക്തസ്രാവമുള്ളവര്‍, സ്തനാര്‍ബുദം ഉള്ളവര്‍, എന്നിവരെ കൂടാതെ ഗര്‍ഭിണികള്‍ ആയവര്‍ക്കും ഈ മരുന്നു കഴിക്കാന്‍ പാടില്ലാത്തതാണ്. കൃത്യമായ ഇടവേളകളിലല്ലാത്ത ആര്‍ത്തവം ഉള്ള സ്ത്രീകളില്‍ ( ഐ.പില്ലിന്റെ ഉപയോഗം കൂടുതലായി ആവശ്യമായി വരുന്ന വിഭാഗങ്ങളില്‍) മുന്‍പുള്ള ഗര്‍ഭധാരണ സാദ്ധ്യത തള്ളിക്കളയാനാവില്ല.
മരുന്നു കഴിച്ചതില്‍ ഗര്‍ഭധാരണം നടന്നില്ല എന്നു ഉറപ്പാക്കാന്‍ മാര്‍ഗ്ഗങ്ങളൊന്നുമില്ലാത്തതും, മരുന്നു കഴിച്ചിട്ടും ഗര്‍ഭം ധരിക്കുകയാണെങ്കില്‍ അത് കുഞ്ഞിന് വൈകല്യങ്ങള്‍ ഉണ്ടാക്കും എന്നതും ചേര്‍ത്ത് വായിക്കപ്പെടേണ്ടതാണ്.

20 മുതല്‍ 30 ശതമാനം വരെ പരാജയ സാദ്ധ്യത ഉണ്ട് എന്നു കരുതപ്പെടുന്നുണ്ട്.

ഏതൊരു മരുന്നിനേപ്പോലെയും വിദഗ്ധ ഉപദേശം ആവശ്യമുള്ള ഈ മരുന്ന് നമ്മുടെ യുവ തലമുറയുടെ രക്ഷകരായി അവതരിപ്പിക്കപ്പെടുന്നത് ആശാസ്യമായ ഒന്നല്ല. സ്വതന്ത്ര ലൈംഗിഗ ബന്ധം എന്ന സങ്കല്‍പ്പമാണ് സ്വാതന്ത്ര്യത്തിന്റെ മുഖമുദ്ര എന്നു കരുതുന്നവര്‍, ജാള്യത ഏതുമില്ലാതെ തന്നെ ഒരു ഡോകടറെ സമീപിച്ച് ഗര്‍ഭ ധാരണം തടയുന്നതാവും ഉത്തമം.

അവലംബം:
www.ukmicentral.nhs.uk/newdrugs/reviews

11/16/2008

ചില വിദ്യകള്‍

മൃഗസംരക്ഷണ മേഖലയിലെ ചില സൂത്രവിദ്യകള്‍

ഡീബീക്കിംങ്

മുട്ടക്കോഴികളെ ഡീപ്പ് ലിറ്റര്‍ രീതിയില്‍ വളര്‍ത്തുമ്പോള്‍ നടത്താറുള്ള ഒരു സൂത്രവിദ്യയാണിത്. പത്തോ പതിഞ്ചോ കോഴികളെ ഒന്നിച്ച് ഒരു മുറിയില്‍ വളര്‍ത്തുന്ന രീതിയാണ് ഡീപ് ലിറ്റര്‍ രീതി. മുട്ടക്കോഴികളുടെ വര്‍ദ്ധിച്ച പ്രോട്ടീന്‍ ആവശ്യവും, കൂട്ടമായി വളരുമ്പോള്‍ ഉടലെടുക്കുന്ന ഒരു ദുശ്ശീലം എന്ന നിലയിലും ഉരുത്തിരിയുന്ന "കാനിബാളിസം " തടയാനാണിത്.
ലളിതമായ ഒരു വിദ്യ, ചുട്ടുപഴുത്ത ഒരു വായ്ത്തലയാല്‍ ചുണ്ടിന്റെ അഗ്രഭാഗം മുറിച്ചു കളയുന്നു. രക്തസ്രാവമുണ്ടാവുന്നില്ല എന്നതാണ് ഇതിന്റെ ഗുണം. വേദയെപ്പറ്റി നാം വ്യാകുലരല്ല.


ഡീഹോണിംഗ്:


പശുക്കളുടെ ആക്രമണ ഉപകരണമാണല്ലോ അതിന്റെ കൊമ്പ്. എന്നാല്‍ ഫാമുകളിലും മറ്റും പശുവിനു അത് ഒരു അല‍ങ്കാരവും, കൈകാര്യക്കാരന് ഒരു ഭീഷണിയുമാണ് . ഈ കൊമ്പ് മുളയിലേ കരിക്കുക എന്നതാണ് ഏറ്റവും പ്രായോഗികം. പശുക്കുട്ടിയുടെ കൊമ്പിന്റെ മുകുളങ്ങള്‍, അറ്റം കുഴിഞ്ഞ, ചുട്ടുപഴുത്ത ഒരു ഇരുമ്പു ദണ്ഡാല്‍ കരിച്ചിളക്കി എടുക്കുകയാണിവിടെ ചെയ്യുന്നത്. രക്തസ്രാവമുണ്ടാകുന്നില്ലെങ്കിലും രണ്ടുമൂന്നു ദിവസം മരുന്നു പുരട്ടേണ്ട് വരുന്നുണ്ട്.
വേദന ഇവിടേയും ബാധകമല്ല.

വരിയുടക്കല്‍:


കാളകളേയും പോത്തുകളെയും പുരുഷ വര്‍ഗ്ഗത്തില്‍ പെടുത്താമെങ്കിലും , പണിയെടുക്കാന്‍ മാത്രമുള്ള ഒരു വിധേയനായി വേഷമിടുവാന്‍,‍ ഒരു അലങ്കാരം മാത്രമാണ് പൌരുഷം. മാത്രവുമല്ല, അവന്റെ ശാരീരിക ചോദനകള്‍, അവനെ ശൂരനാക്കുകയും, നിയോഗമായ ഉഴവിനെ പ്രതികൂലമായി ബാധിക്കുകയും ചെയ്യും, നിയന്ത്രിക്കാന്‍ ബുദ്ധിമുട്ടു നേരിടുകയും ചെയ്യാം. പാടത്തു പണിയെടുക്കവെ പശുക്കളെ തീറ്റണമെങ്കില്‍ മതില്‍ കെട്ടിയോ, തുണികെട്ടിയോ മറക്കേണ്ടി വരും, അല്ലാത്ത പക്ഷം പശുക്കള്‍ക്ക് കറുത്ത മേലങ്കി ആവശ്യമായി വരും. ഈ ബുദ്ധിമുട്ടുകള്‍ ഒഴിവാക്കാന്‍ ഉള്ള എളുപ്പമാര്‍ഗ്ഗമാണ് കാളകളുടെ വൃഷണങ്ങള്‍ നശിപ്പിച്ചു കളയുക എന്നത്.
ലളിതമാണ് വിദ്യ. ചവണ പോലെയുള്ള ഒരു തരം ഉപകരണം ഉപയോഗിച്ചു വൃഷണങ്ങളിലേക്കുള്ള ധമനി ചതച്ചു കളയുകയും , രക്ത ഓട്ടം നിലച്ച അവ കുറച്ചു ദിവസങ്ങള്‍ക്കുള്ളില്‍ ചുങ്ങിപ്പോവുകയും ചെയ്യുന്നു.


ഇപ്രകാരം ശൂരനായ കാളയുടെ ശൌര്യം നശിപ്പിച്ച് അവനെ വിശ്വസ്ത വിധേയനാക്കുന്ന പ്രകൃയയാണ് വരിയുടക്കല്‍.

ഈ വിദ്യകള്‍പലതും മനുഷ്യ സമൂഹത്തിലും പ്രാവര്‍ത്തികമാക്കുന്ന പക്ഷം ഇന്നു നാം നേരിടുന്ന പല പ്രശങ്ങള്‍ക്കും പരിഹാരമാവുന്നതാണ്. മൃഗങ്ങള്‍ നമുക്കു വഴികാട്ടട്ടെ.


ചിത്രങ്ങള്‍ക്കു കടപ്പാട്: ഗൂഗ്ഗിള്‍

9/23/2008

ക്ലോണിംഗ് - ഒരു ദര്‍പ്പണക്കാഴ്ച

ഇതൊരു കണ്ണാടിയിലെ ദൃശ്യങ്ങളാണ്.സ്വാഭാവികമായും കണ്ണാടിക്കനുസൃതം ദൃശ്യങ്ങള്‍ക്കു വ്യതിയാനം കണ്ടേക്കാം.
ക്ലോണിംഗ് അടിസ്ഥാനപരമായി മൂന്നായി തരം തിരിക്കാം.
1.ഡി.ഏന്‍.ഏ. ക്ലോണിംഗ്:


പ്ലാസ്മിഡുകളും മറ്റും ഉപയോഗിച്ചു ഡി.എന്‍.എ യുടെ ശൃംഖലകള്‍ ആവശ്യാനുസരണം ക്ലോണ്‍ചെയ്തു നിര്‍മ്മിച്ചെടൂക്കുന്ന സാങ്കേതിക വിദ്യയാണിത്.
ഈ സാങ്കേതികവിദ്യ ഉപയോഗിച്ചു നമുക്കാവശ്യമൂള്ള പ്രോട്ടീനുകളുടെ കോഡുകളടങ്ങിയ സീക്വന്‍സുകള്‍ നിര്‍മ്മിക്കാവുന്നതാണ്.


2.പ്രത്യുല്‍പ്പാദനത്തിനായുള്ള ക്ലൊണിംഗ്:

ഡോളിയുടെ ജനനം അടങ്ങുന്ന ക്ലോണിംഗ് വിഭാഗമാണിതു. ഒരു ജീവിയുടെ അണ്ഡ കോശം അലൈംഗിക മാര്‍ഗ്ഗത്തിലൂടെ വികസിപ്പിച്ചെടുത്ത്, ആ ജീവിയുടെ ഒരു പതിപ്പിന് ജന്മം നല്‍കുകയാണ് ഇതില്‍ ചെയ്യുന്നത്.പ്രകൃതി നിയമങ്ങളെ മുറിവേല്‍പ്പിക്കുന്നു എന്ന രീതിയില്‍ വിലയിരുത്തപ്പെട്ടതിനാല്‍ ഏറെ വിമര്‍ശനങ്ങള്‍ക്കു വിധേയമാണീ ശാഖ.വിശിഷ്യാ മനുഷ്യനിലുള്ള ക്ലോണിംഗ്. ഈ വിദ്യയുപയോഗിച്ചു വംശനാശം സംഭവിച്ചുകൊണ്ടിരിക്കുന്ന ജീവിവിഭാഗങ്ങള്‍ പുന്‍ഃസൃഷ്ടിക്കാന്‍ നടന്ന ശ്രമങ്ങള്‍ വിജയം കാണുകയുണ്ടായി. ആദ്യമായി ഇത്തരത്തില്‍ ക്ലോണ്‍ ചെയ്ത മൃഗമായിരുന്നു "ഗോര്‍". കാട്ടു കാളയുടെ വംശത്തിലുള്ള ഒരു ജീവിയാണ് ഗോര്‍. ഈ ക്ലൊണിംഗ് നടത്തിയതു ഒരു പശുവിന്റെ അണ്ഡം ഉപയോഗിച്ചായിരുന്നു എന്നത് പ്രത്യേക ശ്രദ്ധയാകര്‍ഷിക്കുകയും ചെയ്തു. പക്ഷെ ഈ ക്ലൊണ്‍ രണ്ടു ദിവസം മാത്രമേ ജീവിച്ചിരുന്നുള്ളൂ.മൌഫ്ലൊന്‍ എന്നറിയപ്പെടുന്ന കാട്ടു ചെമ്മരിയാടാണ്, വംശനാശത്തിലായ വര്‍ഗ്ഗങ്ങളിലെ വിജയകരമായ ആദ്യ ക്ലോണ്‍. വംശനാശം പൂര്‍ണ്ണമായും തടയാന്‍ ഈ സാങ്കേതിക വിദ്യക്കാവുമോ എന്നതു ഇപ്പോഴും തര്‍ക്കവിഷയമാണ്.

കേരളത്തിലെ വംശനാശം വന്ന, നമ്മുടെ തനതു ബ്രീഡായ വെചൂര്‍ പശുവിനെക്കുറിച്ച് വന്ന ഈ വാര്‍ത്ത കൌകമുളവാക്കുന്നതായിരുന്നു. റോസിലിന്‍ ഇന്‍സ്റ്റിറ്റ്യൂട്ട് വേചൂര്‍ പശുവിന്റെ ജീനുകള്‍ തട്ടിയെടുത്തുവെന്നും, അവയെ ക്ലോണ്‍ ചെയ്യാന്‍ പോകുന്നുവെന്നുമായിരുന്നു അത്. ഒരു വിവാദം മാത്രമായ് ഒതുങ്ങി എന്നുള്ളതില്‍ നമുക്കാശ്വസിക്കാം.(വിവാദമാക്കിയതെന്നും വിവാദമുണ്ട്).
ഇത്തരത്തില്‍ ഈ സാങ്കേതിക വിദ്യ പ്രകൃതി സംരക്ഷണത്തിനായി പ്രയോജനപ്പെടുത്തുകയാണ് ശാസ്ത്രമിന്ന്.


പ്രതികൂലമായ പ്രതികരണമാണ് ഈ വിഭാഗം ക്ലൊണിങ്ങിനു മുന്നിട്ടു നില്‍ക്കുന്നത്. മനുഷ്യനില്‍ നടക്കാവുന്ന ക്ലോണിഗ് പരീക്ഷണത്തിന്റെ ധാര്‍മികത സംബന്ധിച്ചായിരുന്നു ഇത്. ലോകത്താകമാനം ഇതിനു നിയന്ത്രണങ്ങള്‍ വരികയും ചികിത്സാരംഗത്തേക്കു മാത്രമുള്ള പരീക്ഷണങ്ങളായി മനുഷ്യ ക്ലോണിംഗ് നിജപ്പെടുത്തുകയും ചെയ്യപ്പെട്ടു.

3.ചികിത്സക്കായുള്ള ക്ലൊണിംഗ് (തെറാപ്യൂട്ടിക് ക്ലോണിംഗ്)

ഇന്നു ഏറ്റവും വികസിച്ചുകൊണ്ടിരിക്കുന്ന ശാസ്ത്ര ശാഖയാണിത്. മനുഷ്യന്റെ ശരീരം, വൈദ്യശാസ്ത്രത്തിനു വെല്ലുവിളിയാകുന്ന സന്ദര്‍ഭങ്ങളില്‍ ചിലതാണ്, കീഡ്നി തകരാര്‍ പോലെയുള്ള അസുഖങ്ങള്‍. ഈ കോശങ്ങള്‍ ശരീരത്തില്‍ പുതുതായി വളരുകയില്ല എന്നതിനാല്‍ , അവയവം മാറ്റി വക്കുക എന്നത് ഏക ചികിത്സാമാര്‍ഗ്ഗമായി വരുന്നു. ഇത്തരം സന്ദര്‍ഭത്തില്‍ മാറ്റിവച്ച അവയവത്തെ രോഗിയുടെ ശരീരം തിരസ്കരിക്കാന്‍ സാദ്ധ്യതയുണ്ട്. മരുന്നുകളും മറ്റും ഉപയോഗിച്ച് ഈ തിരസ്കരണത്തെ‍ തരണം ചെയ്യാറാണ് പതിവ്. എന്നാല്‍ ഒരു രോഗിയുടെ ശരീരത്തില്‍ നിന്നും തന്നെ എടുക്കുന്ന ജനിതക വസ്തു, ക്ലൊണിംഗിനു വിധേയമാക്കി ഭ്രൂണംകോശം സൃഷ്ടിക്കുകയും, അതില്‍ നിന്നും കിഡ്നി വളര്‍ത്തിയെടുക്കാവുന്ന വിത്തുകോശങ്ങള്‍ വേര്‍തിരിച്ചെടുക്കുകയും സാദ്ധ്യമായാല്‍ ഈ തിരസ്കരണം ഇല്ലാതാവും. അതേപോലെ തലച്ചോറിന് ഏല്‍ക്കുന്ന ക്ഷതവും ശരീരത്തിനു സ്വന്തം നിലയില്‍ പരിഹരിക്കാനാവില്ല. നാഡീ കോശങ്ങള്‍ വളര്‍ത്താനുള്ള വിത്തുകോശം വികസിപ്പിച്ചെടുത്താല്‍, ഈ സ്ഥിതിയും പരിഹരിക്കപ്പെടാനാവും.ഇതാണ് തെറാപ്യൂട്ടിക് ക്ലോണിംഗിന്റെ അടിസ്ഥാനം.

ഈ ശാഖ നേരിട്ടിരുന്ന വിമര്‍ശനം ഭ്രൂണഹത്യ സംബന്ധിച്ചതായിരുന്നു. ഓരോ വിത്തുകോശം വേര്‍തിരിക്കാനും ഒരു ഭ്രൂണം നശിപ്പിക്കേണ്ടി വരുന്നു. ഇതിനു ഒരു പരിഹാരമെന്ന നിലയിലാണ് ഡോ. ഷിന്യ യമനാകയും മറ്റും ക്ലോണിംഗിനു പുതു വിദ്യ പരീക്ഷിച്ചതു. മനുഷ്യന്റെ ചര്‍മ്മ കോശത്തില്‍ നിന്നും എടുക്കുന്ന ജനിതകവസ്തു ഒരു അണ്ഡകോശവുമായി സംയോജിപ്പിച്ചു. ഈ കോശത്തിന്റെ ക്രോമസോം ഘടനയില്‍ ചിലമാറ്റങ്ങള്‍ വരുത്തിയപ്പോള്‍ ഇവ ഭ്രൂണകോശം കണക്കെ വിഘടിക്കാ‍നാരംഭിച്ചു,. വൈറസുകള്‍ ഉപയോഗിച്ചായിരുന്നു ഈ മാറ്റങ്ങള്‍ വരുത്തിയതു. ഇത്തരത്തില്‍ ഭ്രൂണകോശങ്ങള്‍ വികസിപ്പിച്ചെടുക്കാനാവുന്ന സ്ഥിതി സംജാതമായാല്‍ മനുഷ്യഭ്രൂണം ഇപയോഗിച്ചുള്ള ക്ലോണിംഗ് നിര്‍ത്തലാക്കിയേക്കും എന്നുവരെ വിലയിരുത്തപ്പെടുന്നുണ്ട്. ഈ മേഖലയില്‍ നിരവധി പരീക്ഷണ നിരീക്ഷണങ്ങള്‍ നടക്കേണ്ടതുണ്ട്, വിജയം കൈവരിക്കുന്നതോടെ തലച്ചോര്‍ ക്ഷതം അടക്കമുള്ള പല രോഗങ്ങള്‍ക്കുംചികിത്സ ലഭ്യമാക്കാനാവും.

ക്ലോണിംഗിന്റെ വെല്ലുവിളികള്‍:

# ചിലവേറിയതും ഫലപ്രാപ്തിക്കുറവും

# അസുഖങ്ങള്‍ ബാധിക്കാനുള്ള സാദ്ധ്യതകള്‍ ക്ലോണ്‍ ജീവികളീല്‍ ‍ കൂടുതലായി കാണുന്നു.

# ആയുസ്സിനു നേരത്തെ മരണപെടുന്നതു കൊണ്ടു കൃത്യമായ ഡാറ്റ പല സന്ദര്‍ഭങ്ങളിലും ലഭ്യമാകുന്നില്ല.

# മരണപ്പെടുന്ന പല കേസുകളിലും കൃത്യമായ പോസ്റ്റുമോര്‍ട്ടം വിശകലനം സാദ്ധ്യമാകുന്നില്ല.

# ക്ലോണ്‍ ചെയ്തെടുത്ത പല കോശങ്ങളിലും ജീന്‍ തകരാറ് കണ്ടെത്തുകയുണ്ടായി. കോശത്തിന്റെ ഉത്തേജനത്തില്‍ സംഭവിച്ചതാവാനുള്ള സാദ്ധ്യതകള്‍ തള്ളിക്കളയാനാവില്ല.

# ജെനെറ്റിക് ഇമ്പ്രിന്റിങില്‍ തകരാറുകള്‍ സംഭവിക്കാം.

# വൈറസുകള്‍ ഉപയോഗിച്ചു ജനിതകമാറ്റം നടത്തുമ്പോള്‍ ക്യാന്‍സര്‍ പോലെയുള്ള രോഗങ്ങള്‍ക്കു സാദ്ധ്യത ഏറെയാണെന്നും വിലയിരുത്തപ്പെടുന്നു.

ക്ലോണിംഗും ഞാനും:

ഡൊളി ജനിച്ച വര്‍ഷമായിരുന്നു എന്റെ ബിരുദാനന്ദര ബിരുദ ക്ലാസ്സുകള്‍ ആരംഭിക്കുന്നതു.
ആദ്യ സെമിനാര്‍ വിഷയം റീപ്രൊഡക്റ്റീവ് ക്ലോണിംഗ്.
അന്നുമുതലിങ്ങോട്ടു കൌതുകത്തോടെ വീക്ഷിച്ചു വരുന്ന ഈ ശാസ്ത്രശാഖ, കഴിഞ്ഞ പത്തുവര്‍ഷമായി , മറ്റു മേഖലകളിലെയത്ര മുന്നേറ്റം കാണിക്കുന്നില്ല എന്നാണ് എന്റെ വ്യക്തിപരമായ വിലയിരുത്തല്‍. ജൈവകോശങ്ങളുടെ സാങ്കേതിക രഹസ്യങ്ങള്‍ അത്ര എളുപ്പം മനുഷ്യനു പിടിതരുന്നില്ല എന്നതാണ് ഇതിനായ് ഞാന്‍ കണ്ടെത്തുന്ന കാരണം.നേടിയ പരീക്ഷണഫലങ്ങള്‍ പോലും , എല്ലാ കാര്യങ്ങള്‍ക്കും പൂര്‍ണ്ണ ഉത്തരം നല്‍കാന്‍ പര്യാപ്തമാവുന്നില്ലെന്നു തോന്നുകയാണ്. ഒരു പക്ഷെ എന്റെ വായനയുടെ കുറവാകാം. കൂടുതല്‍ വിശദീകരണങ്ങള്‍ തേടിക്കൊണ്ടിരിക്കുകയാണ്. അതുവരെ ജീവന്റെ പല രഹസ്യങ്ങളും മനുഷ്യ വിശകലനത്തിന് അതീതമാണെന്നു വിശ്വസിക്കാന്‍ ഞാന്‍ നിര്‍ബന്ധിതനാവുന്നു. ഓരോ പ്രപഞ്ച രഹസ്യങ്ങളുടേയും ചുരുളുകള്‍ അഴിയുമ്പോഴും , പ്രകൃതിയുടെ സങ്കീര്‍ണ്ണത കണ്ടു വിസ്മയിച്ചു നില്‍ക്കുന്നു.

9/17/2008

സ്വവര്‍ഗ്ഗ വിവാഹിതര്‍ക്കു കുഞ്ഞ്

ത്വക്ക്കോശങ്ങളില്‍ നിന്നും സ്റ്റെം സെല്ല് എന്ന സങ്കല്‍പ്പത്തിന്റെ ഒരു വികലമായ ചിത്രീകരണമാണിതു.

സ്വവര്‍ഗ്ഗ വിവാഹിതര്‍ക്കു മുന്നിലുള്ള ഏറ്റവും വലിയ ജീവിതപ്രശ്നമായിരുന്നല്ലോ ഒരു കുഞ്ഞ് എന്നുള്ള സങ്കല്‍പ്പം. സമീപ ഭാവിയില്‍ തന്നെ ഇതു സാദ്ധ്യമാക്കുന്ന തരത്തിലേക്കാണ് ശാസ്ത്രം പുരോഗമിക്കുന്നതു.

1997 ഇല്‍ റൊസിലിന്‍ ഇന്‍സ്റ്റിറ്റ്യൂട്ട്, ക്ലോണിംഗ് എന്ന സാങ്കേതിക വിദ്യയിലൂടെ ഡോളി എന്ന ചെമ്മരിയാടിനെ സൃഷ്ടിച്ചതോടെയാണ് സ്വവര്‍ഗ്ഗാനുരാഗികളെ സന്തോഷിപ്പിക്കുന്ന ഈ വാര്‍ത്ത പുറത്തു വന്നതു. മനുഷ്യന്‍ മരണത്തെ തന്നെ തോല്‍പ്പിക്കാന്‍ പോകുന്നു എന്ന ഘോഷത്തോടെ ജനിച്ച ഡോളി, പക്ഷെ അകാലത്തില്‍ കൊല്ലപ്പെടുകയായിരുന്നു. തുടര്‍ന്നിങ്ങോട്ടു നടന്ന പരീക്ഷണങ്ങളില്‍ ഡോളിയുടെ പോരായമകള്‍ പലതും അനാവരണം ചെയ്യപ്പെട്ടു.പുതു വിദ്യകള്‍ കണ്ടെത്തി. മനുഷ്യചര്‍മ്മത്തില്‍ നിന്നും എടുത്ത കോശങ്ങള്‍ വിവിധ പരിവര്‍ത്തനങ്ങള്‍ക്കു വിധേയമാക്കി ഏതു തരം കലകളുടേയും വിത്തു കോശങ്ങളാക്കി മാറ്റാം എന്ന കണ്ടെത്തല്‍ ഈ മേഖലയിലെ പുത്തന്‍ ഉണര്‍വാണ്. ഇതിനെത്തുടര്‍ന്നു ക്ലോണിംഗിന്റെ പിതൃസ്ഥാനീയനായ ശാസ്ത്രകാരന്‍ ഇയാന്‍ വില്‍മുട്ട് തന്റെ ഭ്രൂണ പരീക്ഷണങ്ങള്‍ ഉപേക്ഷിക്കുകയാണെന്നു പ്രഖ്യാപിക്കയുണ്ടായി .

ന്യൂയോര്‍ക്ക് ടൈംസില്‍ നവംബര്‍ 2007 നു ,‍ ഡോക്ടര്‍.ഷിന്യ യമനാക എന്ന ജാപ്പനീസ് ശാസ്ത്രജ്ഞനെക്കുറിച്ചു വന്ന വാര്‍ത്ത അടിസ്ഥാനമാക്കി ഒരു സ്വവര്‍ഗ്ഗ ദമ്പതിമാര്‍ക്കു കുഞ്ഞുണ്ടാവുന്നെതെങ്ങിനെ എന്നു ഫോട്ടോഷോപ്പ് ഭാവനയില്‍ സങ്കള്‍പ്പിച്ചതാണ് ഈ ചിത്രം.


ഡോക്ടര്‍. യമനാക പറഞ്ഞതു പ്രകാരം, മനുഷ്യന്റെ ത്വക്ക് കോശങ്ങളെ അടിസ്ഥാന വിത്തുകോശമാക്കി മാറ്റാവുന്നതാണ്. ഇത്തരത്തില്‍ മാറ്റിയെടുക്കുന്ന കോശം ഉപയോഗിച്ചു അണ്ഡകോശമോ, ബീജ കോശമോ, ഒരു ഭ്രൂണ കോശമോതന്നെ സൃഷ്ടിക്കാമെന്നാണ് ഇന്നെത്തി നില്‍ക്കുന്ന അവസ്ഥ.ഒരു വ്യക്തിയുടെ തന്നെ ശരീരത്തില്‍ നിന്നും ഉരുത്തിരിച്ചെടൂക്കാവുന്ന അണ്ഡകോശവും , ബീജ കോശവും സംയോജിപ്പിച്ചാല്‍ ഭ്രൂണം ലഭിക്കം.ഇതു സത്യമാവുന്നതോടെ അലൈംഗിക പ്രത്യുല്‍പ്പാദനം മനുഷ്യനിലും സാദ്ധ്യമാക്കാം.

ചിത്രത്തില്‍ രണ്ടു പുരുഷന്മാരാണ് ഉള്ളതെന്നു കരുതി സ്ത്രീകള്‍ പ്രതിഷേധിക്കണ്ട കാര്യമില്ല. രണ്ടു സ്ത്രീകളായാലും ഇതു സാദ്ധ്യമാവുന്നതാണ്, മാത്രവുമല്ല വാടകക്കു ഗര്‍ഭപാത്രം അന്വേഷിച്ചലയുകയും വേണ്ട.

ഒരാളില്‍ നിന്നും പുംബീജവും മറ്റേയാളില്‍ നിന്നും അണ്ഡവും ഉരുത്തിരിച്ചാല്‍ രണ്ടു വ്യക്തികള്‍ക്കും പ്രാതിനിധ്യവുമാവും.

(ഇതു വരെ പറഞ്ഞ കാര്യങ്ങള്‍ ഒരു സങ്കല്‍പ്പ ഹാസ്യ കഥയായി എടുക്കാനപേക്ഷ.)

ഇനി അല്പം കാര്യം.

ഡോളി ചരിതം.

ഡൊളിയെന്ന ചെമ്മരിയാടിന്റെ ജനനം ജൈവശാസ്ത്രരംഗത്തു ഒരു കുതിച്ചു ചാട്ടമായിരുന്നെന്നു നിസ്സംശയം പറയാം.ജന്തുക്കളുടെ ക്ലോണ്‍ നിര്‍മ്മിതിയില്‍ അദ്യമായിരുന്നില്ല ശാസ്ത്രലോകം വിജയം കണ്ടതു. ജീവി ശരീരത്തിലെ അലൈംഗിക കോശങ്ങളിലില്‍ നിന്നു പിറവിയെടുക്കുന്ന ആദ്യ സസ്തനിയെന്ന ബഹുമതിയാണ് ഡോളി കരസ്ഥമാക്കിയത്. ഡോക്ടര്‍ ഇയാന്‍ വിമൂട്ടിന്റെ നേതൃത്വത്തില്‍ ഉള്ള ശാത്രജ്ഞരാണ് റോസിലിന്‍ ഇന്‍സ്റ്റിറ്റ്യൂട്ടിന് ഈ ബഹുമതി സമ്മാനിച്ചതു. പരീക്ഷണത്തിന്റെ ഒരു രേഖാ ചിത്രം കൊടുത്തിട്ടുള്ളതു നോക്കുക.


ഫിന്‍ ഡോര്‍സെറ്റ് ജനുസ്സില്‍ പെട്ട ഒരു ചെമ്മരിയാടിന്റെ അകിടില്‍ നിന്നുള്ള കോശങ്ങള്‍ ശേഖരിച്ചു പരീക്ഷ്ണശാലയില്‍ വളര്‍ത്തി.സാധാരണയായി ഒരു പ്രത്യേക ധര്‍മ്മം നിര്‍വഹിക്കാനായി, ഭ്രൂണാവസ്ഥയില്‍ തന്നെ രൂപം കോള്ളുന്ന കലകളിലെ കോശങ്ങള്‍ , വിഘടിച്ചാല്‍ സമാന കോശങ്ങള്‍ മാത്രമേ ഉണ്ടവുകയുള്ളൂ. ജനിതക ഘടന അടങ്ങുന്ന ഇവയുടെ കോശമര്‍മ്മം വേര്‍തിരിച്ചു സൂക്ഷിച്ചു.
ഇതേസമയം സ്കോട്ടിഷ് ബ്ലാക്ക് ഫേസ് എന്ന മറ്റോരു ജനുസ്സില്‍ പെട്ട, പൂര്‍ണ്ണ വളര്‍ച്ചയെത്തിയ ചെമ്മരിയാടില്‍ നിന്നും അണ്ഡകോശങ്ങള്‍ ശേഖരിച്ചു. അവയില്‍ നിന്നും മര്‍മ്മം നീക്കം ചെയ്യുകയും പകരംഇവയില്‍ , നേരത്തെ തയ്യാറാക്കിവച്ചിരുന്ന ഫിന്‍ഡോറ്സെറ്റ് ആടിന്റെ കോശ മര്‍മ്മം സ്ഥാപിക്കുകയും ചെയ്തു. ഇപ്രകാരം പുനര്‍നിര്‍മ്മിച്ച അണ്ഡകോശം ഒരു പ്രത്യേക വൈദ്യുത സ്പന്ദനങ്ങള്‍ക്കു വിധേയമാക്കിയപ്പോള്‍ മര്‍മ്മം കോശവുമായി യോജിക്കുകയും, ബീജ സങ്കലനം നടന്ന അണ്ഡത്തിന്റെ സവിശേഷതകള്‍ പ്രകടമാക്കുകയും ചെയ്തു.ശാരീരിക അവസ്ഥകള്‍ ക്രമീകരിച്ച തള്ളയാടിന്റെ ഗര്‍ഭപാത്രത്തില്‍ നിക്ഷേപിക്കപ്പെട്ട ഇവ ഭ്രൂണമായി വളരുകയും, പൂര്‍ണ്ണ വളര്‍ച്ചയെത്തി, ഡോളി എന്നു വിളിക്കപ്പെട്ട ഫിന്‍ ഡോര്‍സെറ്റ് ആട്ടികുട്ടിയായി ജന്മമെടുക്കുകയും ചെയ്തു.


ഇത് ഒരു ചെറു സംഗ്രഹം മാത്രമാണ്, വിസ്താരഭയത്താലും വിഷയത്തിന്റെ ഗഹനതയാലും കൂടുതല്‍ ആഴത്തില്‍ ഇപ്പോള്‍ പരാമര്‍ശിക്കുന്നില്ല

ഈ പരീക്ഷണങ്ങളുടെ ചുവടുപിടിച്ചു ലോകമെമ്പാടും നടന്ന പരീക്ഷണങ്ങളില്‍, ക്ലോണിംഗിലൂടെ വിവിധ ജന്തു വിഭാഗങള്‍ ജനിക്കുകയുണ്ടായി.പരീക്ഷണങ്ങള്‍ വ്യാപിച്ചു മനുഷ്യഭ്രൂണം കൃതൃമമായി നിര്‍മ്മിക്കാമെന്ന ചര്‍ച്ചകള്‍ വന്ന സാഹചര്യത്തില്‍ , ലോകം ഇതില്‍ പുനര്‍ചിന്തനം നടത്തുകയും , പല രാജ്യങ്ങളും മനുഷ്യക്ലോണിംഗ് പരീക്ഷണങ്ങള്‍ നിരോധിക്കുകയും ചെയ്തു. തുടര്‍ന്ന് ഈ സാങ്കേതിക വിദ്യ മനുഷ്യനന്മക്കെപ്രകാരം ഉപയോഗപ്പെടുത്താം എന്ന തലത്തിലേക്കു പരീക്ഷണങ്ങള്‍ വഴിമാറുകയും, ചികിത്സക്കായുള്ള ക്ലൊണിംഗ് ശാഖ ശക്തി പ്രാപിക്കുകയും ചെയ്തു. ഈ പരീക്ഷണങ്ങളുടെ എറ്റവും പുതിയ ഘട്ടത്തിലാണ് ത്വക്ക് കോശങ്ങളില്‍ നിന്നും , ഏതു തരം സ്വഭാവഗുണമുള്ള കോശങ്ങളും സൃഷ്ടിച്ചെടുക്കാമെന്ന നിഗമനങ്ങളിലെത്തിയത്.ചികിത്സാരംഗത്തു ഒരു വലിയ പുരോഗതി സംഭാവന ചെയ്യാന്‍ കഴിവുള്ളതാണീ കണ്ടുപിടുത്തം. ഒരു പരിധി വരെ ഇവ വിജയിച്ചിട്ടുണ്ടെകിലും ഇനിയും കടമ്പകള്‍ നിരവധി താണ്ടേണ്ടിയിരിക്കുന്നു. പരീക്ഷണശാലയില്‍ കൃതൃമമായി നിര്‍മ്മിച്ചെടുത്തു എന്നു പറയപ്പെടുന്ന ഭ്രൂണ കോശങ്ങളുടെ ചിത്രം കാണുക.

ഈ പോസ്റ്റ് തുടരുന്നതാണ്.

അടുത്ത പോസ്റ്റില്‍ കൂടുതല്‍ സാങ്കേതിക കാര്യങ്ങള്‍ വിശദമാക്കാന്‍ ശ്രമിക്കാം

9/05/2008

പ്രോട്ടീന്‍ ഫാക്റ്ററി അധവാ ബ്രോയിലര്‍ കോഴി

ബ്രൊയിലര്‍ കോഴിയിറച്ചി ചില വസ്തുതകള്‍
ബ്രോയിലര്‍ കോഴി എന്നതു കേവലം 40 ദിവസം മാത്രം പ്രായമുള്ള ഒരു കോഴിക്കുഞ്ഞാണ്. വിരിഞ്ഞിറങ്ങുമ്പോള്‍ ഏകദേശം 50 ഗ്രാം മാത്രം ശരീര ഭാരമുള്ള ഇവ ഒരു യന്ത്രം കണക്കെ , ആറാഴ്ചകൊണ്ടു നാലു കിലോയോളം തീറ്റ അകത്താക്കി 2.00 മുതല്‍ 2.50 വരെ കിലോഗ്രാം വരെ ശരീരഭാരം വര്‍ദ്ധിപ്പിക്കുന്നു.അതായതു ഒരു ദിവസം 80 ഗ്രാമോളം തീറ്റ ഇവ 55 ഗ്രാം പ്രൊട്ടീനാക്കി മാറ്റുന്നു എന്നര്‍ഥം.


തീറ്റ എന്നതു വിവിധ ധാന്യങ്ങള്‍ , പിണ്ണാക്കുകള്‍ തുടങ്ങിയവയുടെ നിശ്ചിത അനുപാതത്തിലുള്ള ചേരുവയാണ്. ഇവക്കു പുറമെ പ്രോബയോട്ടിക്കുകള്‍, വൈറ്റമിനുകള്‍, ധാതു ലവണങ്ങള്‍, വളര്‍ച്ചാ സഹായികള്‍ എന്നിവയും തീറ്റയില്‍ ചേര്‍ത്തു നല്‍കുന്നു.


ആധുനിക ശാസ്ത്രത്തിന്റെ ഒരു ഉല്‍പ്പന്നമെന്ന നിലയില്‍ ചില ദൂഷ്യഭലങ്ങളും ബ്രോയിലറിനുണ്ട്. ഇവയില്‍ പ്രതിസ്ഥാനത്തു നില്‍ക്കുന്നതാണ് വളര്‍ച്ചാ സഹായികള്‍


വളര്‍ച്ചാ സഹായികള്‍ (ഗ്രോത്ത് പ്രൊമോട്ടെഴ്സ് ):


പ്രധാനമായും ആന്റി മൈക്രോബിയല്‍ ശക്തിയുള്ള രാസവസ്തുക്കളാണ് ഇവ. ഇതില്‍ ടെട്രാസൈക്ലിന്‍ , ബേസിട്രാസിന്‍, തുടങ്ങിയ ആന്റിബയോട്ടിക്കുകള്‍ , ആമ്പ്രൊളിയം പോലെയുള്ള കോക്സീഡിയ മരുന്നുകള്‍ എന്നിവയാണ് മുഖ്യം. ഇവ ചികിത്സക്കു ആവശ്യം വരുന്നതിനേക്കാള്‍ വളരെ കുറഞ്ഞ അളവില്‍ തീറ്റയില്‍ ചേര്‍ത്താണ് നല്‍കുന്നതു. ഇവയെയാണിന്നു വില്ലന്‍ വേഷത്തില്‍ ശാസ്ത്രം തിരിച്ചറിഞ്ഞിരിക്കുന്നതു. കുറഞ്ഞ അളവില്‍ തുടര്‍ച്ചയായി മനുഷ്യശരീരത്തില്‍ കടന്നുകൂടുക വഴി ഇവ രോഗകാരികളായ ബാക്റ്റീരിയകള്‍ക്കു വളരാനുള്ള സാഹചര്യം ഒരുക്കുന്നതായാണ് പഠനങ്ങള്‍ തെളിയിക്കുന്നതു. ആരോഗ്യരക്ഷാ രംഗത്തുള്ള ആന്റിബയോട്ടിക്കുകള്‍ക്കെതിരായി , ബാക്റ്റീരിയകള്‍ക്കു ശക്തിയാര്‍ജ്ജിക്കാന്‍ (റെസിസ്റ്റന്‍സ്) ഇവ അവസരമൊരുക്കുന്നു.

അമേരിക്കയില്‍ നടന്ന ഒരു പഠനം സൂചിപ്പിക്കുന്നതു, വില്‍പ്പന നടക്കുന്ന 70 ശതമാനത്തോളം ആന്റിബയോട്ടിക്കുകള്‍ മൃഗങ്ങള്‍ക്കുള്ള തീറ്റയിലെ അഡ്ഡിറ്റീവ് ആയി ഉപയൊഗിക്കുന്നു എന്നാണ്. ഇത്തരത്തിലുള്ള ഉപയോഗം സൃഷ്ടിക്കുന്ന ആന്റിബയോട്ടിക് പ്രതിരോധ ശേഷിയുള്ള ബാക്റ്റീരിയകള്‍, നിലവിലുള്ള മരുന്നുകള്‍ക്കു വെല്ലുവിളി സൃഷ്ടിക്കുകയും, പുതിയ മരുന്നുകള്‍ കണ്ടെത്തേണ്ട സാഹചര്യം സംജാതമാകുകയും ചെയ്യുന്നു.

1999 ,ജനുവരി ലക്കം പോള്‍ട്രിസയന്‍സ് ജേണലില്‍ വന്ന ഒരു പഠനം , റോസാഴ്സോണ്‍ എന്ന ഒരു ഫീഡ് അഡിറ്റീവ് സൃഷ്ടിച്ചേക്കാവുന്ന ആരോഗ്യപ്രശ്നങ്ങളേക്കുറിച്ചായിരുന്നു. ആഴ്സെനിക് എന്ന വിഷ ഘടകം മനുഷ്യകോശങ്ങളില്‍ അടിഞ്ഞ് ക്യാന്‍സര്‍വരെ ഉണ്ടാക്കാം എന്നു പരാമര്‍ശിച്ചിരിക്കുന്നു. കോഴിയിറച്ചി കഴിക്കുക മൂലം മാത്രമല്ല ഇവ മനുഷ്യനിലെത്തുന്നതെന്നാണ് പഠനങ്ങള്‍. കോഴിക്കാഷ്ടം, കൂട്ടിലെ അവശിഷ്ടങ്ങളും നൈട്രജന്‍ മൂല്യമുള്ള പ്രമുഖ ജൈവവളങ്ങളാണ്. കൃഷിയിടങ്ങളിലെ ഇവയുടെ ഉപയോഗവും പഠനവിഷയമാക്കിയിരിക്കുന്നു. ജൈവകൃഷിക്കു പിന്നാലെ പായുന്ന നാം, ഈ മേഖലയില്‍ വ്യക്തമായ നിലവാരങ്ങള്‍ പോലും (സ്റ്റാന്‍ഡേഡ്സ്, ക്വാളിറ്റി കണ്ട്രോള്‍) നിയമമായിട്ടില്ല എന്നകാര്യം വിസ്മരിക്കരുതു.

കേരളത്തിലെത്തുന്ന ബ്രോയിലര്‍ കോഴികളില്‍ ഏറിയ പങ്കും തമിഴ്നാടിന്റെ വിവിധ ഭാഗങ്ങളില്‍ നിന്നാണ്. ഒരു വന്‍ വ്യവസായമായി വളര്‍ന്നിരിക്കുന്ന കോഴിവളര്‍ത്തലില്‍ സര്‍ക്കാര്‍ ഇടപെടല്‍, പരിശോധന ഇവ തുലോം കുറവാണ്.തീറ്റക്രമം പോലും ചില കമ്പനികള്‍ അവരുടെ വ്യാവസായിക രഹസ്യമായി സൂക്ഷിച്ചിരിക്കുന്നു.

തമിഴ്നാടിന്റെ ചുവടു പിടിച്ച് നാം ബ്രോയിലര്‍ ഫാം തുടങ്ങിയെങ്കിലും വേണ്ട രീതിയില്‍ ഉള്ള ശരീരഭാരം ആര്‍ജ്ജിക്കാന്‍ കോഴികള്‍ക്കായില്ല. രേഖപ്പെടുത്തുന്ന തീറ്റകള്‍ക്കും മരുന്നുകള്‍ക്കും പുറമേ മറ്റു രാസവസ്തുക്കള്‍, ഹോര്‍മോണ്‍ അടക്കമുള്ളത്, ഉപയോഗിച്ചിരിക്കാനുള്ള സാദ്ധ്യതകളിലെക്കാണിതു വിരല്‍ ചൂണ്ടുന്നതു. ഇവ സംബന്ധിച്ച വ്യക്തമായ പഠനങ്ങള്‍ ഇനിയും നടക്കേണ്ടിയിരിക്കുന്നു.

കഴിഞ്ഞ അനേകം വര്‍ഷങ്ങളായി പഠന വിധേയമാക്കുന്ന ഒരു സാമൂഹിക വിഷയമാണ് പെണ്‍കുട്ടികള്‍ കുറഞ്ഞ പ്രായത്തില്‍ ഋതുമതികളാകുന്ന അവസ്ഥ.ഇതില്‍ മുന്‍പന്തിയില്‍ മാംസഭക്ഷണം കഴിക്കുന്നവരാണെന്ന് വിലയിരുത്തേണ്ടിയിരിക്കുന്നു.ഇത്തരം സാഹചര്യങ്ങള്‍കൂടി കണക്കിലെടുത്തു , ബ്രോയിലര്‍ ഇറച്ചി തീറ്റ, കുട്ടികളിലെങ്കിലും നിയന്ത്രിക്കുന്നതായിരിക്കും , ആരോഗ്യപരമായ സമീപനം എന്നാണ് എന്റെ വ്യക്തിപരമായ വിലയിരുത്തല്‍.

ചിത്രങ്ങള്‍ക്കു കടപ്പാട് ഗൂഗിള്‍.

8/31/2008

പശുക്കളുടെ വര്‍ണ്ണക്കാഴ്ച,കാളകളുടെയും

മാളുത്താ വീട്ടുടമയാണ്.

ഈയാഴ്ചമുതല്‍ പാല്‍ വാങ്ങുന്നതവിടെ നിന്നായിരിക്കും എന്ന ഭാര്യയുടെ പ്രഖ്യാപനം, അടുത്ത പോസ്റ്റിനുള്ള നാന്ദിയാവുമെന്നു സ്വപ്നേപി നിരൂപിച്ചില്ല.

ഇന്നലെ മോളെക്കൂട്ടി ഞാന്‍ താത്തയുടെ വീട്ടിലേക്കു പോയി, വെളുമ്പിപ്പയ്യിനെ കാണാന്‍, ലക്ഷ്യം ഒരു സൌഹൃദ സംഭാഷണം, പശുക്കുട്ടിയാവട്ടെ തുറിച്ചു നോക്കുന്നു,അതിന്റെ പാലാണല്ലൊ നമുക്കു കട്ടെടുത്തു തരുന്നതു.
ഒരു ചുവന്ന ബക്കറ്റില്‍ വെള്ളം മോന്തിനില്‍ക്കുന്ന പയ്യിനോടു കുശലം പറഞ്ഞ്, ഞങ്ങള്‍ വീട്ടിനുള്ളില്‍ കയറി. പാലും ഒന്നു പരിശോധിക്കണമല്ലൊ.സാമാന്യ മര്യാദയുടെ പേരിലാവാം താത്ത ചായ കൊണ്ടുവന്നു, നല്ല ചായ, കൊഴുപ്പുള്ള പാല്‍, മൊത്തത്തില്‍ സന്തോഷം.

"എല്ലാ ദിവസവും ഈ സമയത്താണൊ വെള്ളം കൊടുക്കുന്നതു?" ചുമ്മാ ഒരു ചോദ്യം.
അതെയെന്നുത്തരം.


"ഇതേ പാത്രത്തില്‍ ?"
വീണ്ടും അതേയെന്നുത്തരം.


മന്‍സ്സിലിള്ളതു പുറത്തുകാട്ടാതെ ഞങ്ങള്‍ മടങ്ങി.

ഇന്നു അതേസമയത്തു വീണ്ടും പശുവിനെത്തേടിപ്പുറപ്പെട്ടു.മനസ്സില്‍ ഒരു അടുക്കള പരീക്ഷണം.

വെളുമ്പി എത്തിയിട്ടില്ല , ചായ കിട്ടുമെന്നു കരുതി അതും ഇല്ല !!

ഒരു ചുവന്ന ബക്കറ്റും നീല ബക്കറ്റും എടുത്തു ഞാന്‍ മുറ്റത്തു വച്ചു, നീലബക്കറ്റാദ്യം. വെളുമ്പി പാഞ്ഞു വന്നു, നീലബക്കറ്റു കാണാത്ത ഭാവത്തില്‍ ചുവപ്പു ബക്കറ്റിന്റെ അടുത്തേക്കു ഒറ്റ ഓട്ടം, അതും കാലിയാണെന്നു കണ്ടപ്പോള്‍ കലിയിളകി അലറി , ബ്ബേ....... .

പറയൂ , പശുവിനു ചുവപ്പും നീലയും തിരിച്ചറിയാമോ?
പശുക്കള്‍ വര്‍ണ്ണങ്ങള്‍ തിരിച്ചറിയില്ലെന്നു വായിച്ചതോര്‍മ്മയുണ്ടൊ?

ആശയത്തിനു കടപ്പാട്: ഡയറി ആന്റ് സ്വൈന്‍ റിസേര്‍ച്ച് അന്റ് ഡവലപ്മെന്റെ സെന്റര്‍ , കനഡ.

വര്‍ണ്ണക്കാഴ്ച: ഒരു ലഘു വിവരണം.

ധവളപ്രകാശം ഒരുകൂട്ടം വര്‍ണ്ണ രശ്മികള്‍ ചേര്‍ന്നാണുണ്ടാവുന്നത്. പ്രാഥമിക വര്‍ണ്ണങ്ങളെന്നു വിളിക്കപ്പെടുന്ന പച്ച , നീല, ചുവപ്പ് എന്നിവ കൂടിച്ചേര്‍ന്നാല്‍ ധവള പ്രകാശം ലഭിക്കും. സ്കൂളില്‍ പഠിച്ച ഈ വിവരങ്ങള്‍ ഓര്‍മ പുതുക്കാന്‍ മാത്രം ചിത്രം നോക്കുക.

പ്രിസത്തില്‍ വീഴുന്ന ധവള പ്രകാശം വിഘടിച്ചു വിവിധ വര്‍ണ്ണങ്ങളാകുന്നു





വര്‍ണ്ണങ്ങളും തരംഗ ദൈര്‍ഘ്യങ്ങളും


പ്രാഥമിക വര്‍ണ്ണങ്ങളും അവയുടെ വര്‍ണ്ണക്കൂട്ടുകളും


ഒരു വസ്തുവില്‍ ധവളപ്രകാശം പതിക്കുമ്പോള്‍ ആ വസ്തുവിന്റേതായ വര്‍ണ്ണ ഘടകം ഒഴികെ മറ്റേല്ലാം അതു ആഗിരണം ചെയ്യുകയും , പ്രതിഫലിപ്പിക്കപ്പെടുന്ന രശ്മികള്‍ നമ്മുടെ കണ്ണുകളില്‍ എത്തി വര്‍ണ്ണക്കാഴ്ച സാദ്ധ്യമാക്കുന്നു എന്നതാണ് അടിസ്ഥാന തത്വം.


ചുവന്ന ആപ്പിളിന്റെ നിറം എപ്രകാരം ചുവപ്പായിക്കണുന്നു എന്നൊരു സൂചനാ ചിത്രം

വര്‍ണ്ണ സംവേദനം.

ധവളപ്രകാശത്തില്‍ അടങ്ങിയിര്‍ക്കുന്ന വിവിധ വര്‍ണ്ണങ്ങളും അവയുടെ തരംഗ ദൈര്‍ഘ്യവും ആദ്യം കൊടുത്ത ചിത്രത്തില്‍ കണ്ടിരുന്നല്ലൊ. ഒരു വസ്തുവില്‍ നിന്നും പ്രതിഫലിച്ചെത്തുന്ന നിശ്ചിത തരംഗദൈര്‍ഘ്യമുള്ള (വര്‍ണ്ണം) രശ്മികള്‍ മനുഷ്യന്റെ കണ്ണുകളുമായി സംവദിക്കുമ്പോള്‍ , നമ്മുടെ ഓര്‍മയുടെ അറയില്‍ സൂക്ഷിച്ചിട്ടുള്ള സമാന വര്‍ണ്ണ ബോധവുമായി അതു താരതമ്യം ചെയ്യപ്പെടുകയും , പ്രസ്തുത വസ്തുവിന്റെ വര്‍ണ്ണം അതാണ് എന്ന് നാം തിരിച്ചറിയുകയും ചെയ്യുന്നു.പച്ച , ചുവപ്പു,നീല തുടങ്ങിയ, തികച്ചും ആപേക്ഷികമായ, നാമകരണം മനുഷ്യനു മാത്രമുള്ളതാണ്. പച്ച വര്‍ണ്ണ രശ്മികളുടെ നിറം പച്ചയാണെന്നു നാം പഠിച്ച് ഓര്‍മയില്‍ സൂക്ഷിച്ചിരിക്കുന്നതിനാലാണ്‍ അവയെ പച്ച എന്നു വിളിക്കുന്നതു. മൃഗങ്ങളുടെ കാര്യത്തില്‍ ഇത്തരം നാമകര‍ണങ്ങള്‍ പ്രസക്തമല്ലെന്നു ബോധ്യപ്പെടുത്തുന്നതിലേക്കാണിതു സൂചിപ്പിച്ചതു.


മൃഗങ്ങളിലെ വര്‍ണ്ണക്കാഴ്ച.


മൃഗങ്ങളിലെ വര്‍ണ്ണക്കാഴ്ചയുമായി ബന്ധപ്പെട്ടു വിശദീകരണം നടത്തുന്ന ഘട്ടങ്ങളില്‍ , ഇവയെ നിശ്ചിതമായ തരംഗദൈര്‍ഘ്യത്തിന്റെ അടിസ്ഥാനത്തില്‍ മാത്രം പരാമര്‍ശിക്കേണ്ടി വരുന്നു. വര്‍ണ്ണങ്ങളുമായി ബന്ധപ്പെട്ട, ഹ്യൂ, സാച്ചുറേഷന്‍ , തീവ്രത എന്നിവ ഇവിടെ പരാമര്‍ശിക്കുന്നില്ല, ലാളിത്യത്തിനു വേണ്ടി.

കേംബ്രിഡ്ജ് യൂണിവേഴ്സിറ്റിയില്‍ പശുക്കളില്‍ നടന്ന ഒരു പഠനത്തില്‍ , ഇവക്കു, പ്രകാശത്തിന്റെ നീണ്ട തരംഗദൈര്‍ഘ്യമുള്ള രശ്മികളും (ചുവപ്പെന്നു “വിളിക്കപ്പെടുന്ന“) കുറഞ്ഞ തരംഗദൈര്‍ഘ്യമുള്ള രശ്മികളും (നീല) വ്യക്തമായി വേര്‍തിരിച്ചറിയാനാവും എന്നു കണ്ടെത്തി. മദ്ധ്യവര്‍ണ്ണങ്ങളും(പച്ച) തരംഗദൈര്‍ഘ്യം കുറഞ്ഞ രശ്മികളും(നീല) അത്രകണ്ടു വേര്‍തിരിച്ചറിയില്ല. വിവിധ തരംഗദൈര്‍ഘ്യമുള്ള രശ്മികളുടെ സാന്നിധ്യത്തില്‍ ചില പരീക്ഷണങ്ങല്‍ക്കു നേരെ ഇവ പ്രകടിപ്പിച്ച പെരുമാറ്റ വ്യതിയാനങ്ങള്‍ വിലയിരുത്തിയായിരുന്നു ഈ പഠനം.

ഈ വിശകലനം ലളിതവല്‍ക്കരിച്ചാല്‍ നീലനിറമുള്ള ഒരു വസ്തുവും ചുവപ്പുനിറമുള്ള ഒരു വസ്തുവും രണ്ടും രണ്ടു നിറമാണെന്നു പശുവിനു/കാളക്കു തിരിച്ചറിയാനാവും എന്നു അനുമാനിക്കേണ്ടിയിരിക്കുന്നു. പച്ചയും നീലയും തമ്മില്‍ അത്രക്കു വേര്‍തിരിച്ചറിവു ലഭിക്കുന്നുമില്ല.

കണ്ണുകളുടെ ഘടന ഒരു ചെറു വിവരണം



ചിത്രം നോക്കുമല്ലൊ. ഇതില്‍ കാണിച്ചിരിക്കുന്ന റോഡുകോശങ്ങള്‍ അരണ്ടവെളിച്ചത്തിലുള്ള കാഴ്ചയും, കോണ്‍ കോശങ്ങള്‍ തീവ്ര പ്രകാശത്തിലുള്ള കാഴ്ചകള്‍ക്കൊപ്പം വര്‍ണ്ണക്കാഴ്ചയും സാദ്ധ്യമാക്കുന്നു. മനുഷ്യന്റെ കണ്ണിനെ അടിസ്ഥാനപ്പെടുത്തിയ ചിത്രമായതിനാല്‍ മൂന്നു പ്രാധമിക വര്‍ണ്ണങ്ങള്‍ക്കുമുള്ള മൂന്നു തരം കോണുകള്‍ അടയാളപ്പെടുത്തിയിട്ടുണ്ടിവിടെ.കാലിഫോര്‍ണിയ യൂണിവേസിറ്റിയില്‍ ഇലക്ട്രൊ റേറ്റിനോഗ്രാം ഉപയോഗിച്ചു നടത്തിയ ഒരു പഠനത്തില്‍ കന്നുകാലികളില്‍ രണ്ടു തരതിലുള്ള കോണുകളുടെ സാന്നിധ്യമാണു തിരിച്ചറിഞ്ഞത്. ഈ അവസ്ഥയെ ബൈപിഗ്മെന്റഡ് എന്നു വിളിക്കാം.

കുതിരകളീല്‍ നടത്തിയ മറ്റൊരു പരീക്ഷണം ഇതേ ഫലം നല്‍കുന്നു.

ചുവപ്പുവര്‍ണ്ണം പ്രകോപനപരമോ?

സൈക്കൊളജിക്കല്‍ റിവ്യൂ ജേണല്‍ നല്‍കുന്ന വിവരമനുസരിച്ചു ചുവപ്പു വര്‍ണം പശുക്കളിലും കാളകളിലും യാതൊരു വിധ പ്രകോപനവും സൃഷ്ടിക്കുന്നില്ല എന്നാണു കണ്ടെത്തിയിട്ടുള്ളതു.കര്‍ഷകര്‍ക്കു നല്‍കിയ ചോദ്യാവലിയും മറ്റും അടിസ്ഥാനപ്പെടുത്തിയായിരുന്നു പഠനം.

എന്നാല്‍ ഡെന്മാര്‍ക്കില്‍ , ഡാനീഷ് ഇന്‍സ്റ്റിറ്റ്യൂട്ട് ഓഫ് അഗ്രിക്കള്‍ച്ചറല്‍ സയന്‍സ് നടത്തിയ ഒരു പരീക്ഷണം കൌതുകകരമാണു

ഒരുകൂട്ടം പശുക്കുട്ടികളെ രണ്ടു വ്യത്യസ്ഥ വര്‍ണ്ണവസ്ത്രങ്ങള്‍ ധരിച്ചു രണ്ടു ആളുകള്‍ വ്യത്യസ്ഥരീതിയില്‍ കൈകാര്യം ചെയ്യുന്നതാണ് പരീക്ഷണം. ഒരാള്‍ അവക്കു സ്നേഹവും തീറ്റയും മറ്റും നല്‍കി അടുപ്പം സൃഷ്ടിച്ചു.

മറ്റോരാള്‍ അവയെ ഉപദ്രവിച്ചു വെറുപ്പു സൃഷ്ടിച്ചു.

തങ്ങളെ ഉപദ്രിവിക്കുന്ന ആള്‍ അണിഞ്ഞനിറത്തൊട്, അവ അകലം പാലിക്കുന്നതായാണു നിരീക്ഷണങ്ങള്‍ സൂചിപ്പിച്ചതു.

ഈ പരീക്ഷണങ്ങളില്‍ നിന്നും നമുക്കു മനസ്സിലക്കാനാവുന്നതു ഇതാണ്. പ്രകോപനം സൃഷ്ടിക്കുന്ന തരത്തില്‍ ചുവന്ന നിറം ഒരു കാളയെ തുടര്‍ച്ചയായി പരിചയപ്പെടുത്തിയാല്‍, അവ ആ നിറവുമായി പരിചയപ്പെട്ടാല്‍, പിന്നീട് ചുവന്ന നിറം കാണിച്ചു അവയെ വിറളി പിടിക്കാന്‍ സാധിക്കും. അങ്ങിനെ സങ്കല്‍പ്പിച്ചു നോക്കുന്നതില്‍ തെറ്റില്ല എന്നു കരുതുന്നു

ലിങ്കുകള്‍ കൊടുത്തിരിക്കുന്ന പലതും സംഗ്രഹങ്ങള്‍ മാത്രമാണ്. മുഴുവന്‍ പ്രസിദ്ധീകരണവും വായിക്കാന്‍ എന്റെ സാമ്പത്തിക സ്ഥിതി അനുവദിക്കുന്നതല്ല. ബൂലോകര്‍ ക്ഷമിക്കുക.

രണ്ടു ദിവസത്തെ ഗൂഗിള്‍ സേര്‍ച്ച് ഫലങ്ങള്‍ ബൂലോകര്‍ക്കായി സമര്‍പ്പിക്കുന്നു.

8/24/2008

ശങ്കുവും ഹോമിയൊപ്പതിയും പിന്നെ ഞാനും

ഹോമിയൊപ്പതി -മൂന്നു കേസ് ചരിത്രങ്ങള്‍

മീന- അഡിനോയിട്

ശങ്കരനെന്നാണു മുഴുവന്‍ പേര്‍., ശങ്കുവെന്നു ഓമനപ്പേരും.
വീട്ടിലെ തോട്ടവും പാടവും ജീവനോടെ നില്‍ക്കുന്നതു ശങ്കുവിന്റെ കാരുണ്യത്താല്‍.
ശങ്കു ജീവനോടു നില്‍ക്കുന്നതു മകള്‍ മീന കാരണം, ഒന്നുമില്ല ജീവനാണവളെ , അത്രമാത്രം.
ആ ശങ്കുവിനു ബുദ്ധിമുട്ടുവന്നാല്‍ അച്ഛനു അടങ്ങിയിരിക്കാന്‍ പറ്റുമോ?
മീനക്കു ആറു വയസ്സു, കേഴ്വി കുറഞ്ഞു വരുന്നു.അമല ഹോസ്പിറ്റലിലേക്കു പാഞ്ഞു. പരിശോധനകള്‍ക്കു ശേഷം തീരുമാനമായി ഉടന്‍ അഡിനെക്റ്റമി നടത്തണം.ശങ്കു കരച്ചില്‍ അച്ഛന്റെ സാന്ത്വനമൊന്നും ഏറ്റില്ല. അടുത്ത ദിവസം അഡ്മിറ്റാകാന്‍ തയ്യാറായി വരാന്‍ സമ്മതിച്ചു പോയ ശങ്കുവിനെ മൂന്നു ദിവസം കഴിഞ്ഞും കാണാഞ്ഞ് തിരക്കിപ്പോയ അച്ഛനെ ഞെട്ടിച്ചുകൊണ്ടു ശങ്കു വീട്ടിലിരിക്കുന്നു, മടിയില്‍ മകളും. അവര്‍ നേരെ പോയതു വീട്ടിനടുത്തുള്ള ഹോമിയൊ ഡൊകടറുടെ അടുത്തെക്കാണു.
ഒരാഴ്ച മരുന്നു കഴിച്ചപ്പോഴേക്കും കെഴ്വി തിരികെ വരാന്‍ തുടങ്ങി. ഏകദേശം ഒരു വര്‍ഷ ചികിത്സ, രോഗം പൂര്‍ണ്ണമായും ഭേദമായി.വീണ്ടും അമലയിലേക്കു, പരിശോധനകളില്‍ പൂര്‍ണ്ണാരോഗ്യവതി.

റൊജാപ്പാക്കു- ഗര്‍ഭപാത്രത്തിലെ ഫൈബ്രൊയിഡ്.


പേര്‍ റൊജ, എന്റെ സഹപാഠിയാണു, റോജാപ്പാക്കെന്നു സ്നേഹപൂര്‍വം വിളിക്കുംഞങ്ങള്‍.
കൂറച്ചു ദിവസമായി മുഖത്തു മ്ലാനത, ക്ഷീണം. കാര്യമന്വേഷിച്ചിട്ടു മറുപടിയില്ല.
കൂട്ടുകാരിയോടന്വേഷിച്ചു, സംഭവം ഗൌരവം. ഗര്‍ഭപാത്രത്തില്‍ ഫൈബ്രോയിഡ്. 11*7.8*9.5 ഗര്‍ഭപാത്രതിന്റെ ആന്റീരിയറ് ഭിത്തിയില്‍, ഫണ്ടസ്സില്‍ ഒരു ചെറുത് , സ്കാന്‍ റിസള്‍ട്ടാണു. ഹോമിയൊ ഡൊക്ടറെ കണ്ടാലൊ എന്നു നിര്‍ദ്ദെശിച്ചതു മനസ്സില്ലാമനസ്സൊടെ സമ്മതിച്ചു. ഇപ്പോള്‍ മൂന്നു മാസം കഴിഞ്ഞു.
സ്കാന്‍ നടത്തി, വലുപ്പം 6*3.7, ചികിത്സ തുടരുന്നു.

ഞാന്‍: അല്ലര്‍ജി.

പൊടികണ്ടു പിടിക്കാനുള്ള യന്ത്രമാണെന്നു അമ്മ. ഒരു പൊടിപാറിയാല്‍ മതി തുമ്മല്‍ യന്തം പ്രവര്‍ത്തനം തുടങ്ങും. പിന്നെ മൂക്കൊലിപ്പു, ചുമ, അവസാനം പനി. മാസത്തില്‍ ഇപ്രകാരം രണ്ടെപ്പിസോഡെങ്കിലും ഉണ്ടാവും. ആറൊ, അതോ ഏഴൊ , ഓര്‍മയില്ല അത്രക്കു പഴക്കം വരും. ടെസ്റ്റിനായി കുത്തിക്കുത്തി എന്റെ കൈ വേദനിച്ചു തുടങ്ങിയെന്നു പറയാം, മരുന്നു തിന്നു പള്ളയും കരിഞ്ഞു.
വീണ്ടും നമ്മുടെ ഹോമിയോ ഡോക്ടറുടെ അരികില്‍. ആദ്യം ഒരു പൊടി, മൂന്നാഴ്ച മൂന്നുനേരം മരുന്നു. പഞ്ചാരഗുളിക കിട്ടിയില്ല, അതിനാല്‍ ഭയങ്കര കൈപ്പായിരുന്നു. പിന്നെ ദിവസം ഒരു നേരവും, ആഴ്ചയില്‍ ഒരു നേരവും വച്ചു മൂന്നു മാ‍സം മരുന്നുകള്‍. ശുഭം.
പതിബെല്‍ കമ്പനി ഉപേക്ഷിച്ചു പോയ പൊടി റോഡിനരുകില്‍ ഒഫ്ഫീസ്സിലിരുന്നു വാഹനങ്ങളെണ്ണാമിപ്പോള്‍ , തുമ്മല്‍ നഹീ.

ഹൊമിയൊപ്പതി എല്ലാം തികഞ്ഞതാണെന്നൊ എല്ലാചികിത്സയും ഉള്ളതാണെന്നൊ പറയാനല്ല ഇതിവിടെ ഇട്ടതു.ഇതൊരു സ്യൂഡോ സയന്‍സാണെന്നു കാര്യമായ പ്രചരണം നടക്കുനുണ്ടു. അത്തരക്കാര്‍ അതൊന്നു പുന്‍ഃപരിശോധിക്കണം എന്നു മാത്രം കരുതി.


അടുത്തിടെ കണ്ട ചില പോസ്റ്റുകള്‍.


റിയാസ് അഹമ്മെദ്

അഞ്ചല്‍ക്കാരന്‍

കെ.പി.സുകുമാരന്‍ അഞ്ചരക്കണ്ടി.

കുറിഞ്ഞി ഓണ്‍ ലൈന്‍